Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, janë sekuestruar pasuritë e shtetasit Shkëlzen Kastrati, i shpallur në kërkim ndërkombëtar nga Interpol Gjermania për veprën penale “Trafikim i narkotikëve” që prej vitit 2022, si dhe të babait të tij, Isni Kastrati, pasi dyshohet se nuk justifikohen me burime të ligjshme financiare.
Hetimet janë zhvilluar në bashkëpunim me Seksionin e Krimit Ekonomik në Drejtorinë e Policisë Tiranë, në kuadër të procedimit pasuror nr. 01, të regjistruar më 18 shkurt 2026. Sipas Prokurorisë, nga analiza e thelluar financiare ka rezultuar se shtetasi Shkëlzen Kastrati dhe personi i lidhur me të, babai i tij, nuk disponojnë të ardhura të ligjshme të mjaftueshme për të justifikuar pasuritë e regjistruara në emër të tyre.
Në këto kushte, organi i akuzës ka vlerësuar se ekzistojnë dyshime të arsyeshme se pasuritë janë krijuar si rezultat i përfshirjes së Shkëlzen Kastratit në aktivitet kriminal në fushën e prodhimit dhe shitjes së narkotikëve. Për këtë arsye, Prokuroria kërkoi vendosjen e masës së sekuestros, kërkesë e cila u pranua nga gjykata.
Pasuritë e sekuestruara janë si më poshtë:
- Një pasuri e paluajtshme, njësia nr. 16, në Zonën Kadastrale 8518, në zonën e Plazhit, Durrës, me sipërfaqe 191 metra katrorë, e përfituar nga Isni Kastrati.
- Pasuri të përfituara me kontratë kalimi të drejtash, datë 31.08.2017, me përfitues Shkëlzen Kastratin:
- Apartamenti nr. 36, tip 1+1, me sipërfaqe totale 65.13 m², në seksionin nr. 3, kati i tretë i banimit;
- Apartamenti nr. 39, tip 1+1, me sipërfaqe totale 65.13 m², në seksionin nr. 3, kati i katërt i banimit;
- Garazh me nr. 28.
- Një apartament i përfituar nga Shkëlzen Kastrati përmes kontratës së porosisë nr. 1265, me sipërfaqe totale ndërtimi 104.8 m² dhe 10.5 m² ambiente të përbashkëta, i ndodhur në rrugën “Don Bosko”, në Tiranë.
Hetimet për këtë procedim pasuror vijojnë, ndërsa autoritetet shqiptare janë në bashkëpunim me homologët gjermanë lidhur me çështjen penale ndaj Shkëlzen Kastratit.
