Makina në lumin Dars
Policia ka hedhur dritë mbi dinamikën e ngjarjes së rëndë të ndodhur në Klos, në vendin e quajtur “Ura e Halilit”, ku një automjet është gjetur i përmbysur në rrjedhën e një përroi ndërsa ka arrestuar drejtuesin e saj.
Sipas njoftimit zyrtar, një mjet tip “Audi” me targa angleze ka dalë nga rruga dhe ka përfunduar në përroin e fshatit Dars. Në drejtim të automjetit ka qenë shtetasi A. L., 24 vjeç, banues në fshatin Fullqet, Klos, i cili nga verifikimet rezulton se e drejtonte mjetin në gjendje të dehur.
Policia dyshon se pas aksidentit, 24-vjeçari është larguar nga vendngjarja pa i ardhur në ndihmë pasagjerit, shtetasit Jurgen Karaj, 30 vjeç, banues po në fshatin Fullqet, i cili mendohet se ndodhej në automjet në momentin e aksidentit.
Trupi i 30-vjeçarit ende nuk është gjetur dhe dyshohet se është marrë nga rrjedha e përroit. Ndërkohë, polumbarët e RENEA-s, shërbimet e Policisë dhe forcat zjarrfikëse vijojnë kërkimet intensive në zonën e përroit të fshatit Dars për gjetjen e pasagjerit të zhdukur.
Ngjarja ka ndodhur rreth orës 01:30, ndërsa policia po vijon veprimet hetimore për zbardhjen e plotë të rrethanave dhe përgjegjësive të kësaj ngjarjeje.
