Analisti Fatos Lubonja është shprehur skeptik se kryeministri Edi Rama mund të ndryshojë qëndrim përballë protestave antiqeveritare, të cilat po hyjnë në muajin e tretë. Sipas tij, mënyra se si Rama ka qeverisur ndër vite nuk lë vend për të pritur reflektim.
Lubonja u shpreh se, në një shtet normal, një kryeministër përballë akuzave dhe presionit publik do të kishte reflektuar, madje edhe do të kishte dhënë dorëheqjen.
“Të presësh që Rama të reflektojë është sikur flamingo të bëjë vezë sorrash, është jashtë mënyrës së tij të menduarit dhe qeverisurit. Ajo që ai di të bëjë është të konfliktojë, të poshtërojë, të ushtrojë dhunë verbale dhe kur vjen puna edhe dhunë fizike dhe jo të reflektojë. Reflektim ka pasur kohë të bëjë prej kohësh. Në një vend normal ku ka reflektim do kishte dhënë dorëheqjen se ka minimalisht përgjegjësi morale, politike për të mos thënë edhe ligjore, po të thellohet SPAK dhe të përdorë të njëjtat standarde që ka përdorur me Berishën, do të duhet të ishte para SPAK për të dhënë shpjegime”, u shpreh Lubonja.
Më tej, analisti argumentoi se në një demokraci funksionale përgjegjësia politike dhe ajo ligjore duhet të funksionojnë paralelisht. Sipas tij, mosmbajtja e premtimeve ndëshkohet nga qytetarët përmes votës, ndërsa shkeljet e ligjit duhet të trajtohen nga drejtësia.
“Mos mbajtja e premtimeve ndëshkohet me votë dhe kur shkelen ligjet edhe me drejtësi. Nëse do kishte fijen e aftësisë për t’u penduar, me kohë duhet të kishte ikur nga politika, për mos mbajtjen e shumë gjërave, por këtu nuk ka, sepse këtu kultura është ke të fortët me vete, ke gjykatësit me vete dhe ushtron dhunë mbi shumicën”, deklaroi Lubonja.m.k
