PS kërkon masë disiplinore dhe kallëzim në SPAK për Agron Shehajn pas videos me marrëveshjen e huasë Shqipëri–SHBA.
Partia Socialiste ka kërkuar marrjen e masës disiplinore ndaj deputetit dhe kryetarit të Partisë Mundësia, Agron Shehaj, si dhe referimin e çështjes në Prokurorinë e Posaçme kundër Korrupsionit dhe Krimit të Organizuar (SPAK), pas publikimit të një videoje ku pretendohet se ai ka marrë një kopje të marrëveshjes së huasë mes Shqipërisë dhe Shteteve të Bashkuara të Amerikës në fushën e mbrojtjes.
Në kërkesën e depozituar në Kuvend, socialistët kërkojnë përjashtimin e Shehajt nga pjesëmarrja në komisionet parlamentare dhe seancat plenare për një periudhë 60-ditore.
Sipas PS-së, deputeti ka nxjerrë nga salla e Kuvendit një dokument që përmban informacion të mbrojtur me ligj, duke shkelur legjislacionin për informacionin e klasifikuar.
Në kërkesë thuhet se çështja duhet t’i referohet SPAK-ut për verifikimin e disa veprave penale të mundshme, përfshirë marrjen e paligjshme të informacionit të klasifikuar, përvetësimin e paligjshëm të dokumentit, pengimin e detyrës së funksionarit publik dhe shkelje të dispozitave që lidhen me mbrojtjen e sekretit shtetëror.
PS pretendon se dokumenti lidhet me çështje të sigurisë kombëtare dhe kërkon hetim të plotë për mënyrën e marrjes së tij dhe për çdo person tjetër që mund të jetë përfshirë në këtë çështje.
Agron Shehak mori në një nga sallat e Kuvendit marrëveshjen sekrete për një kredi nga SHBA për mbrojtjen. Në largim e sipër ai u ndoq nga një punonjëse e cila rrëshqiti dhe u lëndua. a.b
