Protesta e organizuar nga opozita shqiptare në Tiranë ka marrë jehonë të gjerë në qindra media ndërkombëtare, të cilat raportojnë për përshkallëzim të tensioneve politike dhe akuzave për korrupsion në vend.
Gazeta më e madhe në Gjermani dhe Europë, BILD, i ka kushtuar vëmendje të veçantë protestës, duke publikuar edhe pamje video nga zhvillimet në kryeqytet. Media gjermane shkruan se protestat kundër korrupsionit po intensifikohen, ndërsa përshkruan skena ku u hodhën bomba molotov ndaj selisë së qeverisë.
“Mijëra mbështetës të Partisë Demokratike protestuan përpara godinës së qeverisë në Tiranë. Prej javësh, Shqipëria po përjeton tensione dhe përplasje. Protesta drejtohet edhe kundër zëvendëskryeministres, e cila vijon të mbajë detyrën pavarësisht një urdhër-arresti,” raporton BILD.
Një protestuese citohet të ketë deklaruar:
“Kemi ardhur këtu për të protestuar kundër qeverisë më të korruptuar në historinë e Shqipërisë.”
Media gjermane thekson gjithashtu se Shqipëria dhe Mali i Zi janë vende kandidate për anëtarësim në Bashkimin Europian, ndërsa vëzhguesit ndërkombëtarë kritikojnë korrupsionin e përhapur dhe përqendrimin e pushtetit nga Partia Socialiste.
Edhe media britanike GB News raporton se protestat shpërthyen gjatë natës pasi prokurorët ngritën akuza ndaj zëvendëskryeministres dhe ministres së Infrastrukturës, Belinda Balluku, për korrupsion të dyshuar. Sipas raportimit, molotovë u hodhën drejt ndërtesave qeveritare, ndërsa policia me pajisje kundër trazirave ruajti institucionet pa ndërhyrë drejtpërdrejt ndaj protestuesve.
Balluku akuzohet se, së bashku me zyrtarë të tjerë dhe kompani private, ka përdorur fonde shtetërore për të favorizuar subjekte të caktuara në projekte të mëdha infrastrukturore. Ajo i ka quajtur akuzat “shpifje, insinuata, gjysmë të vërteta dhe gënjeshtra”, duke deklaruar se do të bashkëpunojë me drejtësinë.
Një nga protestuesit, Arben Sulo, deklaroi për mediat:
“Kemi duruar mjaft. Flitet për dhjetëra e qindra miliona euro të vjedhura dhe ajo nuk jep dorëheqjen. Kjo është e turpshme.”
Ndërkohë, SPAK i ka kërkuar Kuvendit heqjen e imunitetit parlamentar të Ballukut për të lejuar arrestimin e saj. Ende nuk dihet se kur do të votojë Parlamenti, ku mazhorancën e mban Partia Socialiste e kryeministrit Edi Rama.
Tensionet janë shfaqur edhe brenda Kuvendit, ku deputetë të opozitës u përplasën me gardën, ndezën flakadanë, hodhën ujë drejt kryetarit të Kuvendit dhe zunë vendet e ministrave, në përpjekje për të bllokuar seancat parlamentare.
Edhe media bullgare BGNES raporton se mijëra qytetarë dolën në protestë duke kërkuar dorëheqjen e kryeministrit Edi Rama, pas akuzave ndaj Ballukut për ndërhyrje në procedurat e prokurimit publik. Sipas BGNES, Rama ka dalë publikisht në mbrojtje të saj dhe ka lënë të kuptohet se mazhoranca nuk do të mbështesë veprimet e SPAK përpara një vendimi të Gjykatës Kushtetuese në janar.
Zemërimi publik është shtuar edhe nga zhvillimet në Agjencinë Kombëtare për Shoqërinë e Informacionit (AKSHI), ku SPAK ka kryer bastisje për dyshime mbi manipulim tenderësh. Drejtoresha e AKSHI-t, Mirlinda Karçanaj, dhe zëvendësja e saj, Hava Delibashi, janë vendosur në arrest shtëpie. AKSHI konsiderohet një institucion kyç për qeverisjen dixhitale dhe funksionimin e portalit e-Albania.
Lideri i Partisë Demokratike, Sali Berisha, deklaroi se protestat do të vazhdojnë:
“Nuk mund të ketë parlament me ata që vjedhin dhe vrapojnë. Ligji dhe vetëm ligji duhet të mbizotërojë.” a.b
