Doha, kryeqyteti i Katarit, u trondit sot nga shpërthime të fuqishme dhe tymi që mbuloi zonën pas një sulmi të ushtrisë izraelite. Lajmi u konfirmua nga agjencitë ndërkombëtare AFP dhe Reuters, ndërsa Tel Avivi zyrtar pranoi përgjegjësinë për goditjen.
Në një deklaratë për shtyp, ushtria izraelite e cilësoi operacionin si një “sulm të saktë”, duke theksuar se ishte drejtuar ndaj udhëheqësve të lartë të Hamasit. “Para sulmit, u morën masa për të zbutur dëmin ndaj civilëve, përfshirë përdorimin e municioneve precize dhe inteligjencës shtesë”, theksohet në komunikatën e IDF, cituar nga A2 CNN.
Një zyrtar izraelit konfirmoi për mediat ndërkombëtare se objektivi ishte delegacioni negociues i Hamasit që po zhvillonte një takim në Doha. Nga ana tjetër, një përfaqësues i Hamasit i tha BBC-së se grupi i tyre ishte shënjestruar drejtpërdrejt gjatë këtij takimi.
Sipas raportimeve të Sky News, djali i Khalil Al-Hayya, një prej figurave më të rëndësishme të Hamasit jashtë Gazës, ka humbur jetën në këtë sulm. Al-Hayya, i njohur si negociatori kryesor i grupit, shihet si figura më me ndikim e Hamasit jashtë vendit që pas vrasjes së Ismail Haniyeh në korrik 2024. Ai është një nga pesë anëtarët e këshillit udhëheqës të Hamasit që ka marrë drejtimin e organizatës pas eliminimit të Yahya Sinwar nga Izraeli në tetor të vitit të kaluar.
Megjithatë, raportet ndërkombëtare bëjnë të ditur se udhëheqja e Hamasit i ka mbijetuar goditjes.
Sulmi ndaj Katarit ka shkaktuar reagime të ashpra në rajon. Vendet fqinje e kanë dënuar ashpër këtë operacion, duke e cilësuar si një akt “të pabesë” që rrezikon të destabilizojë më tej situatën në Lindjen e Mesme. r.b
