Kenia njeh pavarësinë e Kosovës, reagon Presidentja Osmani

Republika e Kenias ka njohur zyrtarisht pavarësinë e Republikës së Kosovës, duke u bërë shteti i 118-të që e njeh shtetësinë e saj që nga shpallja e pavarësisë më 17 shkurt 2008. Lajmi është konfirmuar nga Ministria e Punëve të Jashtme të Kenias përmes një note verbale të dorëzuar ambasadës së Kosovës në një shtet të tretë.

Ky zhvillim përfaqëson një përparim të rëndësishëm në përpjekjet diplomatike të Kosovës për të forcuar subjektivitetin e saj ndërkombëtar dhe për të siguruar praninë në organizata globale. Njohja nga Kenia vjen në një moment kur Prishtina po intensifikon fushatën për njohje të reja, sidomos në kontinentin afrikan dhe në rajone të tjera ku ka pasur më pak përfaqësim diplomatik.

Presidentja e Kosovës, Vjosa Osmani, ka përshëndetur njohjen si një “akt miqësie dhe respekti ndaj vullnetit të popullit të Kosovës”, ndërsa ka falënderuar autoritetet keniane për vendimin e tyre të drejtë dhe të guximshëm. “Kjo njohje forcon marrëdhëniet ndërmjet dy vendeve dhe kontribuon në paqen dhe stabilitetin ndërkombëtar,” u shpreh Osmani.

Në një reagim në rrjetin social ‘Facebook’, Osmani ka theksuar se kjo njohje është dëshmi e mbështetjes së vazhdueshme për të drejtën e popullit të Kosovës.

“Republika e Kosovës mirëpret vendimin e Republikës së Kenias për ta njohur Kosovën si shtet të pavarur dhe sovran, nëpërmjet vendimit të nënshkruar nga Presidenti Ruto të dërguar zyrtarisht pak më parë në Presidencë.
Kjo njohje është një dëshmi e mbështetjes së vazhdueshme për të drejtën e popullit të Kosovës për liri, pavarësi, sovranitet dhe integritet territorial. Njëkohësisht është edhe njohje e vuajtjeve të gjata e sakrificës shekullore të popullit të Kosovës për liri”, tha ajo.

Analistët ndërkombëtarë e shohin këtë njohje si pjesë të një vale të re mbështetjeje për Kosovën, veçanërisht në kuadër të përpjekjeve të saj për anëtarësim në Këshillin e Evropës dhe Kombet e Bashkuara.

Nga ana e saj, Kenia ka theksuar se njohja e Kosovës është në përputhje me parimet e vetëvendosjes dhe respektimit të sovranitetit. a.b

/DRONI.al/