Dy partitë më të mëdha në vend vendosën sot që të shkarkojnë Këshillin Drejtues të RTSH për shkak të parregullsive qe jane gjetur në garën për drejtuesin e ri të RTSH.
“Që nga sot nisin procedurat për shkarkimin e 9 anëtarëve të Këshillit Drejtues të RTSH, ku 8 janë anëtarë dhe 1 është kryetari i Këshillit Drejtues. Propozoj që nesër të bëjmë dëgjesa me 9 anëtarët, secili me kohën e vet, duke parashikuar një kohë prej 20 minutash për secilin për të mbaruar dëgjesat. Kryesia vlerëson se Këshilli është në shkelje të ligjit, cenon integritet imazh të RTSH dhe ndodhen në kushtet e shpërdorimit të detyrës, neni 115 i Kuvendit. Ju ftojmë të vëmë në lëvizje këtë nen për shkarkimin e anëtarëve – të miratojmë këtë raport për të vazhduar hapin e procedurës dhe për t’iu drejtuar kryetares së Kuvendit për të shkarkuar 9 anëtarët e këshillit, duke qenë se 2 të tjerët dhanë dorëheqjen”, tha kryetarja e Komisionit, Ina Zhupa.
Propozimi I saj është mbështetur edhe deputetët e PS, Evis Kushi dhe Petro Koçi.
“Duhet të fillojmë një proces të rishikimit të kuadrit ligjor, ka qenë një rast i përsëritur dhe duhen marrë masa. Mendoj edhe të rishikojmë ligjin ose statutin ose kodin e etikës, të shohim në detaje të gjithë kuadrin ligjor për të parandaluar shkelje të tilla në të ardhmen”, tha deputetja socialiste Evis Kushi.
“Ka nevojë për një reformë më të thellë. Formula aktuale është politike dhe ka nevojë për një tjetër, për mënyrën si propozohen dhe votohen në Parlament anëtarët e këshillit drejtues. E meta kryesore është formula politike. Duhet rishikuar formula”, deklaroi deputeti I PS, Petro Koçi. a.b
