Një ngjarje e rëndë tronditi këtë mbrëmje Shkodrën.
Pas të shtënave me armë zjarri në fshatin Stom-Golem, ka mbetur i vrarë një person. Lulash Qepuri ka ndërruar jetë në spital.
75 vjeçari u plagos rëndë me armë zjarri mbrëmjen e sotme në fshatin Stom-Golem të Shkodrës.
Një person është futur në lokalin e viktimës dhe ka qëlluar me armë zjarri ndaj 75 vjeçarit. Ai qëlloi me një shotgan disa herë dhe më pas u largua në këmbë nga vendi i ngjarjes.
Qepuri ishte person me precedentë të mëparshëm penalë. Në vitin 2011, i moshuari është arrestuar nga policia.
Arrestimi i tij u bë pasi gjatë kontrollit të ushtruar nga shërbimet policore në lokalin dhe në banesën e tij ngjitur me lokalin, janë gjetur dhe sekuestruar armë zjarri, municione luftarake si dhe fara të bimës narkotike kanabis sativa.
Policia ka sekuestruar 1 armë zjarri Automatik mod.56, 1 armë zjarri tip Revolver shtatëshe, 262 copë fishekë të modeleve të ndryshme, fitila zjarr përcjellës, 111 copë kapsolla detonatorë, si dhe një qese prej 55 gram me fara të bimëve narkotike kanabis sativa.
Ndërkohë Forcat e Ndërhyrjes së Shpejtë po kryejnë kontrolle të shumta në gjithë zonën për të bërë të mundur kapjen e autorit. m.k
