Presidenti amerikan, Joe Biden, i kërkoi sot Kongresit 33 miliardë dollarë ndihmë ushtarake, ekonomike dhe humanitare për të mbështetur Ukrainën “për pesë muajt e ardhshëm”. Biden tha se ishte “kritike” që ligjvënësit amerikanë të miratonin paketën. “Kostoja e kësaj lufte nuk është e lirë, por nënshtrimi ndaj agresionit do të jetë më i kushtueshëm nëse e lejojmë të ndodhë. Ne ose mbështesim popullin ukrainas teksa mbron vendin e vet, ose qëndrojmë indiferentë ndërsa rusët vazhdojnë mizoritë e tyre në Ukrainë”, tha Biden. Ai shtoi: “Ne kemi nevojë për këtë projektligj për të mbështetur Ukrainën në këtë luftë për liri”. Paketa përfshin më shumë se 20 miliardë dollarë ndihmë ushtarake, 8.5 miliardë dollarë ndihmë ekonomike dhe 3 miliardë dollarë ndihmë humanitare. Zyrtarë të Shtëpisë së Bardhë thanë se një pjesë e ndihmës ushtarake prej 20 miliardë dollarësh mund të përdoret për të plotësuar dërgesat e municioneve dhe pajisjeve nga vendet e tjera, duke i lejuar ato vende “të jenë në gjendje të mbrohen plotësisht”. Zyrtarët e karakterizuan nismën në kontekstin e përpjekjes së Biden për të mbledhur botën pas në mbështetjen për Ukrainën. Gjithashtu, në kërkesë përfshihen edhe 8.5 miliardë dollarë ndihmë ekonomike “për të ndihmuar qeverinë e Ukrainës t’i përgjigjet krizës së menjëhershme dhe të vazhdojë të ofrojë shërbime bazë për popullin ukrainas”, njoftoi Shtëpia e Bardhë. Një dokument tjetër nga Shtëpia e Bardhë sugjeronte se financimi do të ndihmonte gjithashtu kundër dezinformatave ruse dhe narrativave të propagandës dhe do të mbështeste mediat e pavarura. Sipas një zyrtari, ndihma shtesë humanitare dhe financimi për sigurinë ushqimore do të përfshihen gjithashtu në shumën prej 3 miliardë dollarësh, po kështu edhe “gruri apo mallrat e tjera” për ata në nevojë. Një pjesë e këtij financimi do të shkojë për trajnimet për punësim, shërbimet e shëndetit mendor dhe për distriktet shkollore të SHBA-së, për të ndihmuar në mbështetjen e ukrainasve që mbërrijnë në SHBA dhe përpjekje të tjera për të mbështetur refugjatët ukrainas dhe vendet që u ofrojnë atyre strehim. Biden shtoi gjithashtu se komentet ruse për mundësinë e një lufte bërthamore ishin “të papërgjegjshme”. “Askush nuk duhet të bëjë komente të kota për përdorimin e armëve bërthamore ose mundësinë e nevojës për t’i përdorur ato”, tha ai. Ndërsa ministri i Jashtëm rus, Sergej Lavrov, tha në fillim të kësaj jave se parandalimi bërthamor është “pozicioni parimor” i Rusisë, por ai shtoi se “rreziku është serioz, është real, nuk mund të nënvlerësohet”. Biden tha gjithashtu se “nuk është e vërtetë” që SHBA dhe NATO janë në një luftë me Rusinë – dhe se pretendimet ruse për një luftë amerikane të tërthortë janë “një justifikim për dështimin e tyre” në Ukrainë. Biden tha se lufta e Rusisë ka hyrë në atë që ai e quajti një “dritare kritike”, duke e bërë ndihmën ushtarake perëndimore edhe më thelbësore. Nëse miratohet, paketa e shpallur, do të nënkuptojë se SHBA ka dhënë rreth 3.4 miliardë dollarë ndihmë për Ukrainën që nga fillimi i pushtimit rus më 24 shkurt.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
