Nga Roland Bejko
Shikoni pak.
Kam qenë dikur Prefekt në një Qark të Shqipërisë. Puna e donte të shkoja nëpër institucione të ndryshme publike edhe unë si ky këtu poshtë në foto. Kemi investuar në shkolla në atë qark aq sa dhe vet kryetari socialist i Qarkut dhe kryetarët e bashkive e komunave të majtë të asaj zone e thoshin me të madhe që “investime të tilla në rrugë e shkolla, siç po bën qeveria demokratike, nuk janë bërë kurrë më parë”.
Megjithatë, unë si përfaqësuesi më i lartë i qeverisë në atë qark, kurrë nuk i lejova vetes të merrja nëpër gojë ish qeverinë socialiste Nano, ta përgojoja atë dhe të mburja qeverinë tonë.
Ky zotëria, sot ishte për vizitë në shkollën 9 vjeçare Bashkim Berisha në Ndroq, me gjas për të parë investimet e bashkisë që drejton, dhe pa iu dridhur qerpiku, aty, bëri një orë politikë para kamerave të tij duke sharë opozitën dhe paraardhësin në bashki.
Por ajo që nuk kuptoj unë, është fakti se si mund të dalë kryetari i bashkisë së kryeqytetit në një institucion të depolitizuar me drejtoreshën e shkollës në krah dhe të bëjë një orë politikë duke thënë se ne jemi më të mirë se ata që ishin para nesh, ne kemi investuar pa fund në shkolla e çerdhe etj.
Dhe pastaj, duke parë në ballore mbiemrin Berisha të shkollës, u kthye e morri krejt pa lidhje një orë nëpër gojë ish kryeministrin Berisha duke e quajtur “përçarës të shqiptarëve, por me që edhe shkolla e ka emrin Bashkim”, tha,- “të bashkohemi të gjithë në zgjedhjet e ardhshme për të mundur “qelbësirat” dhe të gjithë së bashku ti ndalojmë të kthehen përsëri në pushtet..”
Mjaft rëndë.
Kam dëgjuar që shumë njerëz e quajnë monstër.
Po, monstër qenka vërtet. Si mund ta ketë një sjellje publike kaq të neveritshme një kryetar bashkie?!
Këtë nuk mund ta kuptoj. Është rast suigeneris!
Ps. Edhe pse Fax Tv e paraqiste si “live” aktivitetin e tij, gjithçka ishte e montuar dhe e kuruar me kujdes më parë në zyrat e marrëdhënieve me publikun të bashkisë.
