Operacioni “Zonat” në Tiranë, sekuestrohet mbi 1 kg heroinë, arrestohen dy persona.
Policia e Tiranës ka finalizuar fazën e tretë të operacionit të koduar “Zonat”, në kuadër të goditjes së rasteve të furnizimit dhe shpërndarjes së lëndëve narkotike në kryeqytet.
Si rezultat i operacionit, janë arrestuar në flagrancë dy persona, të identifikuar me inicialet G. M., 51 vjeç, banues në Tiranë, dhe Zh. P., 35 vjeç, banues në Gjirokastër.
Sipas policisë, pas informacioneve të siguruara në rrugë operative dhe një pune hetimore të mirëorganizuar, efektivët lokalizuan dhe ndaluan automjetin me të cilin lëviznin dy të dyshuarit në rrugën “Prokop Mina” në Tiranë.
Gjatë kontrollit të automjetit dhe kontrollit fizik, shërbimet e Policisë gjetën dhe sekuestruan 1 kilogram e 71 gramë lëndë të dyshuar narkotike të llojit heroinë, e cila u sekuestrua në cilësinë e provës materiale.
Nga hetimet paraprake dyshohet se sasia e heroinës do të shpërndahej në doza për përdorues të ndryshëm në zona të kryeqytetit, kryesisht në zonën e Tiranës së Re.
