Pas vendimit të Gjykatës së Durrësit për “rrëzimin e kërkesës së Valbona Sakos për vërtetimin e mandatit të Kryetarit të Bashkisë Durrës”, ka reaguar kryetari i PD Lulzim Basha.
Basha e ka përshëndetur këtë vendim, pasi ai sjell shpresë se në këtë vend ka ende gjyqtarë me ndërgjegje që i shërbejnë shtetit të së drejtës dhe jo shtetit partiak.
POSTIMI I BASHES
Farsa e 30 qershorit ishte masakër e Kushtetutës, e ligjit dhe e standarteve. Dua të përshëndes vendimin e Gjykatës së Durrësit, i cili sjell shpresë se në këtë vend ka gjyqtarë e gjyqtare që e kanë të shenjtë Kushtetutën dhe ligjin, se ka shërbyes civilë me kurajo dhe ndërgjegje që i shërbejnë shtetit të së drejtës dhe jo shtetit partiak.
Farsa e 30 qershorit është një grusht kriminal institucional i Edi Ramës, përmes të cilit ai uzurpoi pushtetin vendor, por edhe KQZ-në dhe gjithë sistemin e administrimit të zgjedhjeve përfshi kolegjin zgjedhor.
Të gjithë ata që u bënë pjesë e këtij grushti kriminal institucional, të gjithë ata që i shërbyen Edi Ramës për të dhunuar Kushtetutën dhe ligjin me 30 qershor, do të përgjigjen para drejtësisë për veprimet e tyre kriminale.
