Është shkarkuar nga detyra gjyqtarja e Korçës Entela Prifti.
Gjyqtarja nuk ka kaluar vettingun. Sipas Komisionit të Pavarur të Kualifikimit, gjyqtarja e Apelit Korçë, Entela Prifti, nuk justifikon pasurinë e luajtshme dhe të paluajtshme të krijuar ndër vite.
Hetimi është kryer vetëm në kriterin e pasurisë, megjithëse gjyqtarja ka kërkuar hetimin e saj, edhe në dy kriteret e tjera.
Hetimi dhe problemet
Sipas Komisionit të Pavarur të Kualifikimit, i cili ka kryer një hetim të thelluar, rezulton se për apartamentin me sipërfaqe 55 metra katrorë, pasuri bashkëshortore, gjyqtarja ka deklaruar është blerë nga babai i bashkëshortit, më vlerën 1 milion lekë.
Sipas saj, kjo pasuri është krijuar nga kursimet personale të tij, pensioni dhe qiratë e një banese. Por, tha relatorja, nga hetimi është konstatuar se ka mungesë të dokumentacionit justifikues, për dhuratën prej 1 milion e 600 mijë lekësh të babait të bashkëshortit.
Ka mungesë të dokumentacionit, për të vërtetuar marrjen e një shumë lekësh, nga babai i bashkëshortit.
Si dhe, nuk është deklaruar pronësia në masën 50%, nga ana e bashkëshortit. Më tej, Çiftja tha se, nga komisioni, është konstatuar se, për shitjen e apartamentit 70 metra katrorë, ka mospërputhje mes deklarimeve për çmimin e shitjes, në deklarimet ndër vite dhe asaj të deklaratës Vetting.
Me probleme rezultuan edhe shitja e dy makinave nga ana e gjyqtares, komisioni ka konstatuar se, shitja e këtyre makinave, nuk pasqyron realitetin. “Kur shet një makinë që e ke përdorur më herët, gjasat janë që e shet me çmim më të ulët, ose çmimin e blerë. Kjo për shkak të amortizimit, por nuk ka ndodhur kështu në këtë rast, kur makinat janë shitur më shtrenjtë”, tha relatorja.
Ndërkohë, edhe hetimi për personin e lidhur ka nxjerr në konkluzione të mos deklarimit të pasurisë. Bashkëshorti i gjyqtares, ka deklaruar një apartament dupleks, ky apartament është blerë në vitin 2004, dhe është deklaruar se është blerë në vlerën 2 milionë lekë.
Gjithashtu, mungon dokumentacion provues, ligjor për të justifikuar shpenzimet dhe krijimin e pasurisë. KPK, nëpërmjet relatores Etleda Çiftja, tha se është bërë edhe analiza financiare, ku ka rezultuar se ka bilanc negativ. Të ardhurat e vitit 2004, janë të pamjaftueshme për të blerë apartamentin, tokën arë dhe aksionet e bashkëshortit në një kompani private.
“Fine Four”
Probleme u konstatuan edhe për blerjen vilës, që përdoret si biznes, piceri dhe kafene “Fine Four”. Nga deklarata Veting, rezulton se si burim krijimi për këtë pasuri, janë deklaruar nga subjekti, të ardhurat e bashkëshortit në shumën 9 milionë lekë, të dhuruara nga babi i bashkëshortit. Të ardhurat nga shitja e makinës, kursime nga pagat dhe shpërblimet nga puna e subjektit dhe bashkëshortit. Referuar hetimit, relatorja, tha se sipas deklarimit për këtë objekt, nuk korrespondon sipërfaqja në metra katrorë, nga deklarimet ndër vite, me atë veting. Gjithashtu, Çiftja përmendi si argument mbështetës, të konstatimit edhe sipërfaqen e deklaruar edhe nga emisioni “Fiks Fare”, por edhe nga televizioni “Agon”. Ndërkohë, relatorja Çiftja tha se, nga deklarimet e subjektit, këtë pronë, bashkëshortit të saj, ia ka dhuruar shtetasi Bujar Kore. “Gjysma është deklaruar se, është dhuruar nga shtetasi Bujar Kore, bashkëshortit të gjyqtares. I është kërkuar subjektit të jap shpjegime në lidhje me aftësinë paguese të zotit Kore. I janë kërkuar subjektit deklarime për diferencën që ka mes çmimit të tregut dhe çmimit të blerjes”, tha relatorja.
