Siguria e pushuesve në plazhet e shumta të Gjirit të Durrësit është ende në diskutim.
Sezoni turistik ka filluar dhe pothuajse i gjithë brezi i rërës është zaptuar nga subjektet private që ofrojnë qëndrim, po jo siguri për pushuesit. Çdo subjekt privat duhet të ketë dhe një vrojtues plazhi, ndërsa kullat e vrojtimit duhet të jenë në çdo 200-250 metra plazh.
Kjo rrit kostot e subjektit dhe ul fitimin sezonal. Interesin e ulët të subjekteve e pohon edhe përfaqësuesja e Federatës së Vrojtuesve të Plazheve për Durrësin, Ejona Kaltani.
“Jam instruktore e vrojtuesve të plazheve për Durrësin. Durrësi e ka nisur kursin për vrojtuesit. Disa subjekte kanë marrë masa, po nuk është interes i masivizuar. Me VKM çdo subjekt privat duhet të ketë një vrojtues plazhi. Për momentin shfaqen të interesuar, po shprehen se është ende herët për të marrë masat për vrojtuesit. Situata është kritike, po ne jemi në pritje të vrojtuesve, të kurseve”, u shpreh Ejona Kaltani, Instruktore e Vrojtuesve të Plazheve për Durrësin.
Në plazhin e madh mungon edhe sinjalistika dhe korridoret e dukshme të hyrje-daljeve në det të mjeteve lundruese që përdoren për argëtimin e pushuesve.
Në Policinë Bashkiake të Durrësit bëjnë të ditur se dhjetëra subjekte private që kanë zënë hapësirat e plazhit janë njoftuar se brenda javës së ardhshme duhet të shlyejnë detyrimet dhe marrin lejen përkatëse të përdorimit të plazhit.
Pas datës 15 qershor, subjektet do t’i nënshtrohen kontrolleve të vazhdueshme për plotësimin e kushteve të sigurisë në plazhe. Deri atëherë përgjegjësia për sigurinë e jetës së pushuesve mbetet jetime dhe gjithsecili duhet të rrisë kujdesin ndaj vetes dhe të tjerëve për t’u dhënë ndihmën e parë, teksa pushon buzë Adriatikut./t.ch
