Policia e Vlorës dhe Sarandës kanë zbuluar një rast të kontrabandimit të mallrave, por efektivët nuk kanë arritur të ndalojnë as doganierët e dyshuar dhe as shoferët e kamionit. Gjatë këtij aksioni janë sekuestruar vetëm mallrat kontrabandë, ndërsa janë shpallur në kërkim 4 persona, ndër ta 2 doganierë. Pas një hetimi të nisur prej Departamentit të Kufirit dhe Migracionit në Policinë e Shtetit, në bashkëpunim me Policinë Kufitare Sarandë dhe Policinë e Sarandës, lidhur me parandalimin dhe goditjen e veprimtarisë kriminale, trafiqeve të ndryshme dhe kontrabandës, u sekuestrua një sasi mallrash të cilat hynin kontrabandë në kufirin shtetëror shqiptar prej Pikës së Kalimit Kufitar në Qafë-Botë. Konkretisht është sekuestruar mjeti kamion me targa AA 537 OF tip ”Benz” me të cilin bëhej kalimi i mallrave në Shqipëri, gjithashtu në brendësi të kamionit janë sekuestruar nga Policia në cilësinë e provës materiale rreth 140 thasë me veshje, 9 televizorë, si edhe sende shtëpiake si lavatriçe, dollape, dyshekë, tapete etj. Si autor të kësaj veprimtarie të kundërligjshme kanë rezultuar: K. S., S. M., (shoferë të kamionit) dhe A. C., E. D., (doganier në PKK Qafë-Botë), që kanë bashkëpunuar dhe kanë lejuar kalimin dhe futjen e këtyre mallrave pa i deklaruar në Pikën e Kalimit të Kufirit shqiptar. Të katërt personat e përfshirë në këtë veprimtari të paligjshme janë shpallur në kërkim pasi janë larguar në momentin kur kanë kuptuar se Policia po zhvillonte një hetim dhe u ishte vënë në ndjekje. Po vijon puna për kapjen dhe ndalimin e shtetasve të shpallur në kërkim si edhe për zbardhjen dhe dokumentimin ligjor për të tjera raste të veprimtarisë kriminale të kontrabandës. Materialet iu referuan Prokurorisë për veprën penale ”Kontrabanda me mallra të tjerë”.
