Agjencia e Mbikëqyrjes Policore (AMP) ka vijuar hetimet për dokumentimin e përgjegjësive të punonjësve të Policisë së Shtetit lidhur me ndërtimin e një objekti 5-katësh pa leje në Himarë, i cili u shemb nga IKMT.
Pas konstatimit të objektit, veprimet e para procedurale u kryen nga Policia e Shtetit, e cila arrestoi në flagrancë poseduesin e ndërtesës.
Sipas AMP-së, nga hetimet e deritanishme rezulton se në rast është përfshirë zinxhiri komandues i strukturave policore të Komisariatit të Policisë Himarë. Për katër punonjës policie ka nisur procedimi penal për veprën penale “Shpërdorimi i detyrës”, parashikuar nga neni 248 i Kodit Penal.
Të proceduarit janë:
- Emiljano Prenga, aktualisht Shef i Krimeve në Volum në Komisariatin e Policisë Divjakë, më parë në të njëjtën detyrë në Komisariatin e Policisë Himarë, i ndaluar.
- Klodian Petani, aktualisht Specialist i Hetimit të Krimeve në Komisariatin e Policisë Vlorë, më parë në Komisariatin e Policisë Himarë, i ndaluar.
- Ferit Merkaj, aktualisht Shef i Seksionit të Trafiqeve në DVP Vlorë, më parë Shef i Komisariatit të Policisë Himarë, i shpallur në kërkim.
- Redin Çaushaj, me detyrë SPZ në Komisariatin e Policisë Himarë, i shpallur në kërkim.
Në vijim të veprimeve procedurale, dy prej punonjësve që ishin shpallur në kërkim janë paraqitur dhe janë ndaluar me iniciativë. Ndërkohë, dy të tjerët nuk janë gjetur në banesat e tyre dhe, pavarësisht njoftimeve, nuk janë paraqitur pranë strukturave përkatëse.
Për këta të fundit janë kryer procedurat për shpalljen e tyre në kërkim.
