Lavdije Nela, bashkëshortja e poetit disident Havzi Nela, ka mbajtur një fjalim para Kryeministrisë, në protestën kundër qeverisë së Edi Ramës.
Havzi Nela u ekzekutua nga regjimi komunist më 10 gusht 1988, duke u varur në qendër të qytetit të Kukësit. Lavdije Nela, e cila vuajti edhe vetë dënimin me burg gjatë regjimit komunist, tha se prej 35 vitesh pret që kryeministri Edi Rama të kërkojë falje për firmën e babait të tij, Kristaq Rama, lidhur me ekzekutimin e poetit.
“Jam Lavdije Nela, ish-e burgosur politike. U burgosa së bashku me burrin tim, Havzi Nela. U dënova me 10 vite burg, ndërsa burri im me burg të përjetshëm në kampet e Spaçit dhe Kukësit, deri më 10 gusht 1988”, u shpreh ajo.
Nela përmendi vendimin e regjimit komunist për ekzekutimin e bashkëshortit të saj dhe akuzoi familjen e kryeministrit për mungesë reflektimi ndaj së kaluarës.
“Kam pritur prej 35 vitesh nga Rama të kërkojë falje që babai i tij vari poetin Havzi Nela. Jo vetëm që nuk e bëri, por kërkoi përulje nga deputetët për babain e tij”, deklaroi ajo.
Duke iu drejtuar protestuesve, Nela tha se nuk kërkon hakmarrje, por drejtësi, ndërsa vlerësoi protestat e zhvilluara prej 72 ditësh.
“Ju jeni fëmijët e mi e të Havzi Nelës, sepse po çoni para kauzën tonë”, tha ajo.
Nela u bëri thirrje të rinjve të vijojnë angazhimin për ndërtimin e një Shqipërie të re, ndërsa nga podiumi i protestës iu drejtua drejtpërdrejt kryeministrit Edi Rama.
“Së bashku me ju i drejtohem kryeministrit nga kjo tribunë: Rama, jep dorëheqjen! Largohu dhe përballu me drejtësinë”, u shpreh ajo.
Në përfundim, Lavdije Nela kritikoi ashpër qeverinë Rama, duke e akuzuar për lidhje me krimin dhe korrupsionin, ndërsa kërkoi ndryshim të drejtimit politik të vendit.
“Do ta shpëtoni Shqipërinë nga kjo qeveri. Nuk na duhet kjo qeveri e krimit dhe vrasjes, drogës që punon vetëm për 10 veta”, deklaroi ajo.
