Është identifikuar i riu që u vra me armë zjarri ditën e sotme në Korçë. Viktima është Joan Zuko, rreth 20 vjeç, pjesë e Forcave të Armatosura.
Sipas informacioneve paraprake, i riu dyshohet se është ndjekur nga autori, ndërsa Zuko nuk ishte banor i zonës ku ndodhi ngjarja.
Në përpjekje për t’i shpëtuar autorit, 20-vjeçari dyshohet se është futur në një pallat. Autori e ka ndjekur dhe, pasi e ka kapur brenda ambienteve të pallatit, e ka qëlluar me armë zjarri, duke i shkaktuar vdekjen.
Burime bëjnë me dije se viktima dhe autori dyshohet se kanë qenë shokë dhe janë rritur së bashku. Autori i dyshuar mësohet se ka precedentë penalë për armëmbajtje pa leje dhe plagosje.
Policia ka mundur të identifikojë autorin e dyshuar dhe ka nisur kërkimet për kapjen e tij. Në disa zona janë ngritur postblloqe, ndërsa kontrollet vijojnë për lokalizimin dhe arrestimin e tij.
Grupi hetimor, nën drejtimin e Prokurorisë, po vijon punën për zbardhjen e plotë të rrethanave dhe motivit të vrasjes.
