Foto ilustruese
Një skemë e dyshuar mashtrimi që dyshohet se ka shkaktuar një dëm prej rreth 200 mijë eurosh ndaj Raiffeisen Bank është nën hetim, pasi përfaqësues të institucionit financiar kanë depozituar kallëzim në Policinë e Shtetit.
Sipas raportimeve mediatike, dy persona, Redjon Zaçi dhe Eglind Mançja, dyshohet se kanë shfrytëzuar një dobësi në sistemin digjital të bankës gjatë orëve të vona të natës. Pretendohet se në këto intervale kohore sistemi lejonte kryerjen e transfertave elektronike pa verifikuar menjëherë nëse llogaria kishte fonde të mjaftueshme.
Sipas të njëjtave burime, në skemë janë përfshirë mbi 40 persona, të cilët hapnin llogari bankare dhe kryenin tërheqje të vogla, kryesisht nga 100 euro, ndërsa shumat shpërndaheshin në llogari të ndryshme për të mos ngjallur dyshime.
Hetimet paraprake sugjerojnë se personat e përfshirë kanë përfituar nga vonesat në përditësimin e bilanceve të llogarive, duke mundësuar tërheqjen e parave përpara se sistemi të evidentonte mungesën e fondeve. Sipas raportimeve, dëmi i konstatuar deri tani arrin në rreth 200 mijë euro, por nuk përjashtohet që shifra të ndryshojë me avancimin e hetimeve.
Më 29 korrik 2026, përfaqësues të Raiffeisen Bank iu drejtuan Policisë së Shtetit me një kallëzim, duke dorëzuar edhe një listë me mbi 40 persona për të cilët kërkohet verifikim në kuadër të hetimeve.
Deri tani nuk ka një reagim zyrtar nga Raiffeisen Bank, Policia e Shtetit apo Banka e Shqipërisë lidhur me këtë rast. a.b
