Shoqatat e magjistratëve: Vendimi i Kushtetueses për pagat është tashmë drejtpërdrejt i zbatueshëm
Unioni i Gjyqtarëve të Republikës së Shqipërisë, Shoqata Kombëtare e Gjyqtarëve dhe Shoqata e Prokurorëve kanë deklaruar se, pas mosveprimit të Kuvendit brenda afatit të caktuar nga Gjykata Kushtetuese, vendimi për formulën e re të përllogaritjes së pagave të magjistratëve është bërë tashmë drejtpërdrejt i zbatueshëm.
Në një deklaratë të përbashkët, tre organizatat kujtojnë se Gjykata Kushtetuese, me vendimin nr. 15 të datës 17 shkurt 2026, shfuqizoi ndryshimet ligjore të vitit 2023, duke arritur në përfundimin se ato cenonin statusin financiar të magjistratëve përmes një uljeje të fshehur të pagave.
Sipas deklaratës, Gjykata detyroi Kuvendin të miratonte ndryshimet përkatëse deri më 31 korrik 2026, por ky afat përfundoi pa u ndërmarrë veprimet e nevojshme.
Për këtë arsye, shoqatat theksojnë se duke filluar nga data 1 gusht 2026, pagat e magjistratëve duhet të përllogariten sipas formulës që lidhet me pagën e funksionarit të administratës së lartë publike, në përputhje me vendimin nr. 35/2022 të Gjykatës Kushtetuese. Sipas tyre, e njëjta formulë zbatohet edhe me efekt prapaveprues për periudhën 1 prill 2023 – 31 korrik 2026.
Shoqatat e magjistratëve deklarojnë se do të monitorojnë zbatimin e plotë të vendimit të Gjykatës Kushtetuese dhe u bëjnë thirrje të gjitha institucioneve përgjegjëse të respektojnë detyrimet kushtetuese që burojnë nga ky vendim.a.b
