Kryeministri dhe njëherësh kryetari i Partisë Socialiste, Edi Rama, prezantoi dokumentin e ri strategjik “Prania Besnike” gjatë mbledhjes me drejtuesit politikë të PS-së dhe kryetarët e komisioneve parlamentare. Sipas Ramës, dokumenti përbën një aneks të strategjisë “Besa” dhe i dedikohet ekskluzivisht organizimit dhe funksionimit të Partisë Socialiste.
“Dokumentin strategjik ‘Besa’ e keni tani në dorë. Ky tjetri që është këtu dhe që e ndaj me ju sot si një diskutim të brendshëm është ‘Prania Besnike’. Është aneksi i atij të parit. ‘Prania Besnike’ i adresohet vetëm partisë sonë. Kam kaluar kohë duke parë historitë e partive dhe lëvizjeve që fituan gjithçka, por më vonë humbën sfidën e vazhdimësisë së qëndrueshme të fitoreve të tyre,” u shpreh Rama.
Gjatë fjalës së tij, kryeministri foli edhe për situatën politike në vend, duke deklaruar se Partia Socialiste do të vijojë të ushtrojë qeverisjen për aq kohë sa gëzon mbështetjen e qytetarëve dhe shumicën në Kuvend, duke theksuar se protestat nuk mund të përcaktojnë ndryshimin e pushtetit.
Duke iu përgjigjur pyetjeve mbi qëndrimin e tij në krye të qeverisë pas 13 vitesh, Rama u shpreh se në një sistem demokratik pushteti fitohet dhe humbet vetëm përmes votës.
“Një parti politike as e trashëgon timonin e pushtetit, as ka të drejtë ta lëshojë rrugës, sepse disa të tjerë duan ta ngasin vetë makinën e pushtetit. PS ushtron pushtetin për aq kohë sa populli ia ka dhënë dhe për aq kohë sa ka votat në Kuvend,” tha ai.
Kryeministri shtoi se as ai dhe as Partia Socialiste nuk mund të vendosin se kush qeveris apo kush qëndron në opozitë, pasi ky është një vendim që u takon qytetarëve përmes zgjedhjeve.
Rama komentoi edhe kërkesat për dorëheqjen e tij, duke deklaruar se nuk mund të largohet nga detyra për shkak të protestave të një pjese të qytetarëve.
”‘Rama jepe dorëheqjen’, ajo këngë mua më pëlqen dhe më energjizon. Por të largohesh nga detyra pse një pakicë thërret në kor, është vetëm braktisje e një përgjegjësie të madhe,” u shpreh ai.
Në përfundim, kreu i qeverisë tha se Partia Socialiste do të vazhdojë të ndjekë objektivin e saj për anëtarësimin e Shqipërisë në Bashkimin Evropian.
“Misioni ynë do të vazhdojë deri në vendosjen e flamurit të Skënderbeut dhe Ismail Qemalit në oborrin e Europës së bashkuar,” deklaroi Rama.a.b
