Ministri për Evropën dhe Punët e Jashtme, Ferit Hoxha, ka reaguar pas raportimeve lidhur me kërkesën e Serbisë për të hapur një Konsullatë të Përgjithshme në Shkodër, duke sqaruar se procesi lidhet me parimin e reciprocitetit në marrëdhëniet diplomatike mes dy vendeve.
Sipas Hoxhës, Shqipëria ka kërkuar hapjen e një Konsullate të Përgjithshme në Luginën e Preshevës, ndërsa Serbia, nga ana e saj, ka paraqitur kërkesën për hapjen e një Konsullate të Përgjithshme në Shkodër.
“Nëse dhe kur palët të bien dakord për çdo aspekt dhe detaj të këtij procesi, në momentin e duhur do të ndërmerren veprimet përkatëse. Në praktikën e konsoliduar diplomatike, reciprociteti është një parim themelor i marrëdhënieve ndërmjet shteteve dhe një instrument i politikës së jashtme për të avancuar interesat kombëtare. Ai nuk nënkupton domosdoshmërisht barazi në përmbajtje, në objektiva apo në interesat e secilës palë,” u shpreh ministri.
Hoxha theksoi se prioriteti i Shqipërisë është krijimi i një pranie të përhershme konsullore në Luginën e Preshevës, ku jeton një komunitet i rëndësishëm shqiptar.
“Synimi dhe interesi i Shqipërisë është të krijojë më në fund një prani konsullore të përhershme në Luginën e Preshevës, një zhvillim i vonuar, në një hapësirë ku jeton një komunitet i rëndësishëm shqiptar. Kjo do të krijojë mundësi më të mira për të qenë më pranë qytetarëve shqiptarë atje, për t’i mbështetur ata në mënyrë më të drejtpërdrejtë dhe për të kontribuar në mbrojtjen e interesave të tyre legjitime,” deklaroi ai.
Ministri shprehu gjithashtu habinë për reagimet që, sipas tij, janë fokusuar te kërkesa e Serbisë, duke lënë në plan të dytë interesin e Shqipërisë për hapjen e një konsullate në Luginën e Preshevës.
“Politika jonë e jashtme nuk ndërtohet mbi emocione apo perceptime, por mbi interesin kombëtar, respektimin e normave dhe praktikave të së drejtës ndërkombëtare, si dhe mbi frymën dhe vlerat evropiane. Ky është standardi ynë sot, por edhe standardi që Shqipëria synon të mbajë si vendi i ardhshëm anëtar i Bashkimit Evropian,” përfundoi Hoxha.
