Prokuroria e Posaçme Kundër Korrupsionit dhe Krimit të Organizuar (SPAK) ka intensifikuar hetimet për lotët e tenderit të Unazës së Madhe. Pas zgjatjes së afatit të hetimeve me tre muaj, SPAK ka marrë autorizimin e Gjykatës së Posaçme për kryerjen e tetë kontrolleve në kuadër të këtij procedimi.
Burime bëjnë me dije se kontrollet do të ushtrohen në Tiranë dhe Durrës në subjekte, banesa dhe prona të personave që janë nën hetim në dosjen që lidhet me zëvendëskryeministren dhe ministren e Infrastrukturës dhe Energjisë, Belinda Balluku.
Veprimet hetimore synojnë administrimin e provave të reja që mund t’i shërbejnë zbardhjes së rrethanave të çështjes dhe verifikimit të dyshimeve për procedurat e ndjekura në dhënien e kontratave për lotët e Unazës së Madhe.
Deri më tani, SPAK nuk ka dhënë detaje zyrtare mbi identitetin e personave apo subjekteve të përfshira në kontrolle, ndërsa hetimet për çështjen vijojnë.
