Protesta qytetare kundër qeverisë ka hyrë në ditën e saj të 61-të, ndërsa qindra qytetarë marshuan edhe këtë mbrëmje në rrugët e Tiranës, duke kërkuar dorëheqjen e kryeministrit Edi Rama dhe ndryshime në qeverisje.
Pas tubimit të zhvilluar përpara Kryeministrisë, protestuesit vijuan marshimin në disa nga akset kryesore të kryeqytetit, përfshirë rrugën “Myslym Shyri”, duke mbajtur pankarta dhe duke brohoritur slogane kundër qeverisë.
Gjatë marshimit u dëgjuan thirrje si “Poshtë patronazhistët”, “Edi Rama jepe dorëheqjen”, “Shqipëria kërkon revolucion”, “Shqipëria e rinisë, jo e partisë”, “Parlament analfabet”, “Rama ik”, “Dorëheqje” dhe “Atdheu është i yni, jo biznes privat”.
Sipas organizatorëve, protesta ka tejkaluar tashmë një kauzë të vetme dhe përfaqëson pakënaqësinë ndaj qeverisjes, korrupsionit dhe problemeve sociale. Ata deklaruan se mobilizimi do të vijojë çdo ditë deri në përmbushjen e kërkesave të tyre.
Aktivistët dhe qytetarët pjesëmarrës thanë se protestojnë për çështje që lidhen me funksionimin e institucioneve, pushtetin vendor, shërbimet publike, largimin e mjekëve dhe infermierëve, mungesën e investimeve në shërbimet emergjente, si dhe problematika të tjera që, sipas tyre, prekin jetën e përditshme të qytetarëve.
Protesta, e cilësuar nga organizatorët si “Revolucioni i Flamingove”, vijon prej 61 ditësh radhazi, ndërsa ata kanë paralajmëruar se tubimet dhe marshimet do të vazhdojnë edhe në ditët në vijim.
