Nëse miratohet projekti i PS, nga harta administrativo-territoriale do të zhduken 15 bashki, të cilat do të bashkohen me bashki të tjera. Konkretisht, Bashkia Pukë do të bashkohet me Fushë-Arrëzin, Klosi me Matin, Rrogozhina me Kavajën, Dimali dhe Poliçani me Beratin, Patosi me Fierin, Divjaka me Lushnjën, Selenica me Vlorën, Këlcyra me Përmetin, Maliqi me Korçën, Memaliaj me Tepelenën, Libohova me Gjirokastrën, Cërriku dhe Belshi me Elbasanin, ndërsa Përrenjasi me Librazhdin. Po ashtu, zona e Rinasit parashikohet t’i bashkohet Bashkisë Tiranë.
Projektligji parashikon gjithashtu një organizim të ri administrativ me 46 bashki, 71 qytete dhe 387 njësi administrative, ndërsa ndarja në 12 qarqe mbetet e pandryshuar, duke shmangur nevojën për ndryshime kushtetuese.
Sipas procedurës, drafti do t’u dërgohet për konsultim bashkive dhe këshillave bashkiakë, të cilët do të kenë 60 ditë afat për të dhënë opinionet e tyre. Më pas, projektligji do t’i nënshtrohet shqyrtimit në komisionet parlamentare dhe pritet të votohet në Kuvend gjatë sesionit të ri parlamentar në muajin tetor.
Reforma mbështetet nga Partia Socialiste dhe Partia Socialdemokrate, ndërsa Partia Demokratike ka dalë kundër reduktimit të numrit të bashkive, duke propozuar shtimin e tyre.a.b
