Një konflikt i ndodhur brenda ambienteve të Policisë Bashkiake të Tiranës ka përfunduar me arrestimin e një punonjësi. Në pranga është vënë 31-vjeçari A. Hazizi, i cili dyshohet se ka ushtruar dhunë ndaj shefit të Sektorit të Mbikëqyrjes së Territorit, S. Delija.
Sipas informacioneve të besueshme nga policia, përplasja nisi pasi Hazizi u njoftua për transferimin e tij në një sektor tjetër të institucionit. Debati verbal mes palëve më pas dyshohet se u përshkallëzua në dhunë fizike, ku punonjësi goditi me grusht eprorin e tij.
Nga deklarimet e dhëna, S. Delija ka sqaruar se incidenti lidhet me ushtrimin e detyrës, pasi ishte ai që i komunikoi vartësit vendimin e drejtuesve për transferimin. Ngjarja është referuar për hetime dhe ndaj 31-vjeçarit është regjistruar procedim penal.
Pjesëtarë të policisë bashkiake akuzojnë drejtoreshën e këtij institucioni për krijimin e një klime të rëndë në repart. r.k
