Protesta antiqeveritare në Tiranë shënoi këtë të martë ditën e saj të 60-të, duke përmbyllur dy muaj mobilizim të pandërprerë të qytetarëve në kryeqytet. Ajo që nisi si një reagim ndaj zhvillimeve në Zvërnec është shndërruar në një lëvizje të përditshme kundër qeverisë, me kërkesa për dorëheqjen e kryeministrit Edi Rama, zgjedhje të lira dhe ndryshim të mënyrës së qeverisjes.
Edhe këtë mbrëmje, protestuesit u mblodhën përpara Kryeministrisë dhe më pas zhvilluan marshimin e zakonshëm në rrugët e Tiranës, duke përsëritur sloganet “Rama ik!”, “Dorëheqje!” dhe “Shqipëria nuk dorëzohet!”.
Gjatë tubimit, aktivisti Mirjan Aliaj deklaroi se protesta do të vijojë deri në largimin e kryeministrit. Ai tha se nga dita e nesërme nis “numërimi mbrapsht” për Edi Ramën dhe i bëri thirrje këtij të fundit të largohet nga detyra përpara muajit shtator.
Aliaj i drejtoi gjithashtu një apel SPAK-ut, duke kërkuar hetimin e kryeministrit lidhur me atë që ai i cilësoi si prova për afera që lidhen me zhvillimet në bregdet dhe ligjin për zonat e mbrojtura. Sipas tij, Prokuroria e Posaçme duhet të ndërmarrë veprime ndaj Ramës.
Në protestë foli edhe aktivistja Albina Ruko, e cila u shpreh se 60 ditët e mobilizimit kanë rikthyer shpresën tek qytetarët. Ajo tha se protesta është bërë simbol i kundërshtimit ndaj sistemit dhe i kërkesës për ndryshim, duke theksuar se organizatorët janë të vendosur ta vijojnë atë edhe në ditët në vijim, deri në realizimin e objektivave të shpallura.
