Policia e Lezhës ka finalizuar operacionin e koduar “Final O’clock”, duke arrestuar një 39-vjeçar që dyshohet se tregtonte bizhuteri floriri dhe ora dore luksoze të kontrabanduara dhe të vjedhura jashtë vendit.
Në pranga ka rënë shtetasi A. M., banues në Lezhë, pronar i një argjendarie në qytet. Sipas hetimeve paraprake, ai dyshohet se siguronte sendet me vlerë pas kontrabandimit të tyre në Shqipëri dhe më pas i shiste në biznesin e tij.
Gjatë kontrollit në argjendari, policia sekuestroi 133 ora dore të markave luksoze, pa dokumentacion që vërtetonte origjinën e tyre, si dhe bizhuteri floriri me peshë totale rreth 3.3 kilogramë, gjithashtu pa faturat përkatëse të blerjes. Vlera e sendeve të sekuestruara llogaritet rreth 300 mijë euro.
Në cilësinë e provës materiale u sekuestruan edhe rreth 270 500 lekë dhe 2 700 euro, të cilat dyshohet se janë përfituar nga kjo veprimtari kriminale.
Policia bën me dije se hetimet vijojnë për dokumentimin e plotë të rastit, si dhe për identifikimin e personave të tjerë që mund të kenë bashkëpunuar me 39-vjeçarin. Materialet procedurale i janë referuar Prokurorisë pranë Gjykatës së Juridiksionit të Përgjithshëm Lezhë për veprime të mëtejshme.
