Nënkryetari i Komisionit të Ekonomisë, Eno Bozdo, i ka kërkuar SPAK-ut të veprojë menjëherë lidhur me atë që e cilëson si “afera e TEC-eve lundruese”, të njohura si “Tigri 1 dhe 3”.
Në një deklaratë për mediat, Bozdo ngriti shqetësimin se, ndërsa Enti Rregullator i Energjisë (ERE) ka refuzuar më 3 shtator rilicencimin e dy TEC-eve dhe ka pezulluar procedurën, KESH ka hapur një tender të ri me vlerë rreth 20 milionë euro për operimin dhe mirëmbajtjen e tyre për dy vitet e ardhshme.
Sipas Bozdos, situata është veçanërisht problematike pasi TEC-et, sipas tij, nuk kanë punuar praktikisht dhe pavarësisht kësaj kostot për qira, mirëmbajtje dhe karburant kanë vijuar.
Ai pretendon se deri tani për dy TEC-et janë paguar mbi 65 milionë dollarë, prej të cilave më shumë se 44 milionë dollarë për qira dhe mbi 21 milionë dollarë për mirëmbajtje. Sipas tij, kësaj shume i shtohen edhe mbi 18 milionë dollarë të shpenzuara për karburant, duke e çuar faturën e pretenduar në rreth 83 milionë dollarë.
Bozdo tha se gjatë dy viteve të fundit janë prodhuar gjithsej rreth 109 mijë MWh energji nga një kapacitet i pretenduar prej 110 MW, ndërsa kostoja e deklaruar nga KESH ka qenë rreth 163 euro për MWh.
Në deklaratën e tij, ai denoncoi edhe një procedurë rreth 5.3 milionë euro për depozitimin dhe ngarkim-shkarkimin e lëndës djegëse, e zhvilluar, sipas tij, me negocim pa njoftim paraprak. Bozdo pretendon se në procedurë mori pjesë vetëm një kompani, e cila u shpall fituese me 99.95% të fondit limit.
Por, sipas tij, shqetësimi kryesor lidhet me tenderin e ri prej rreth 20 milionë eurosh për operimin dhe mirëmbajtjen e TEC-eve gjatë dy viteve të ardhshme. Duke llogaritur edhe shpenzimet e mëparshme, Bozdo tha se fatura e përgjithshme e kësaj çështjeje po i afrohet 100 milionë eurove.
“Çfarë prove tjetër pret SPAK-u për të vepruar?”, deklaroi Bozdo, duke kërkuar që Prokuroria e Posaçme të sekuestrojë të gjithë praktikën shkresore që lidhet me TEC-et, nga Ministria e Infrastrukturës dhe Energjisë deri te KESH.
Ai kërkoi gjithashtu anulimin e tenderit të ri prej 20 milionë eurosh dhe publikimin e plotë të kontratave të qirasë, të cilat, sipas tij, KESH ka refuzuar t’i bëjë publike duke iu referuar “sekretit tregtar”.
Bozdo e cilësoi çështjen si një aferë me kosto të lartë për buxhetin dhe korporatën publike, ndërsa kërkoi që institucionet përgjegjëse të hetojnë nëse ka pasur shkelje ligjore dhe dëm financiar.
“Kemi rreth 100 milionë euro në këmbim të asgjëje; kemi procedura pa garë me 99.9% të fondit limit; kemi shkelje flagrante të rregullave mjedisore deri në pezullim licence; kemi dëm financiar marramendës të drejtpërdrejtë ndaj korporatës publike dhe xhepave të shqiptarëve”, tha ai.
Në fund, nënkryetari i Komisionit të Ekonomisë kërkoi nga SPAK që të nisë veprimet hetimore dhe të administrojë dokumentacionin përkatës, duke argumentuar se vijimi i procedurave të reja financiare për TEC-et, pas pezullimit të licencimit nga ERE, kërkon ndërhyrjen e institucioneve të drejtësisë.
