Gjykata Kushtetuese ka pranuar ankimin e ish-oficerit të Policisë së Shtetit, Dritan Zagani, duke shfuqizuar vendimin e Kolegjit Penal të Gjykatës së Lartë të 18 shkurtit 2025 dhe duke e kthyer çështjen për rishqyrtim.
Sipas një njoftimi për shtyp, publikuar nga avokati Dorian Matlija, vendimi i zbardhur më 21 korrik 2026 konsiderohet një zhvillim i rëndësishëm në çështjen e ish-shefit të Seksionit të Narkotikëve në Fier, i cili u dënua me 4 vjet e 6 muaj burg për veprat penale “shpërdorim detyre” dhe “moskallëzim krimi”.
Në vendimin e saj, Gjykata Kushtetuese vlerëson se Gjykata e Lartë nuk ka trajtuar në mënyrë të plotë pretendimet e mbrojtjes, duke cenuar të drejtën e Zaganit për një proces të rregullt ligjor dhe duke e bërë aksesin e tij në drejtësi vetëm formal.
Çështja e Dritan Zaganit lidhet me denoncimet që ai bëri vite më parë për lidhjet e ish-ministrit të Brendshëm Saimir Tahiri me grupin Habilaj dhe për trafikimin e lëndëve narkotike. Zaganibu sulmua atëherë edhe nga Kryeministri Edi Rama. Në njoftim theksohet se Zagani u largua nga Shqipëria dhe përfitoi azil politik, ndërsa më vonë grupi Habilaj u hetua dhe Tahiri u dënua penalisht.
Sipas mbrojtjes, akuza ndaj Zaganit lidhej me një operacion antidrogë në Levan të Fierit, ku ai kishte raportuar informacionin te eprorët, ndërsa drejtimi i operacionit ishte në kompetencë të tyre. Epror i tij në atë kojë ishte dtejtori aktual i Policisë së Shtetit, Skënder Hita. Ky i fundit nuk u hetua fare dhe asnjë prej drejtuesve të tjerë të operacionit nuk u procedua penalisht.
Pas vendimit të Gjykatës Kushtetuese, dosja do të rikthehet në Gjykatën e Lartë, e cila do të duhet të rishqyrtojë çështjen dhe t’u japë përgjigje pretendimeve të ngritura nga mbrojtja lidhur me bazën ligjore të dënimit dhe administrimin e provave.m.k
