Pas aksidentit tragjik pranë qendrës tregtare TEG, ku humbën jetën dy shtetas egjiptianë dhe tre persona të tjerë mbetën të plagosur, Drejtoria e Përgjithshme e Shërbimeve të Transportit Rrugor (DPSHTRR) ka reaguar lidhur me pretendimet se viktimat ishin pajisur me leje drejtimi dhe dokumentacion profesional në Shqipëri.
Sipas DPSHTRR, verifikimet në regjistrat elektronikë dhe bazat zyrtare të të dhënave tregojnë se shtetasit Mohamed Lotf dhe Mohamed Ali nuk janë pajisur me leje drejtimi shqiptare dhe as me Dëshmi Aftësie Profesionale (DAP) për profilin “Automakinist”.
Institucioni sqaron se DAP “Automakinist” është dokumenti i detyrueshëm për drejtimin e automjeteve për përdorim të veçantë, ku përfshihen edhe autobetonierët.
DPSHTRR thekson gjithashtu se, sipas Kodit Rrugor, shtetasit e huaj mund të drejtojnë mjete në Shqipëri për një periudhë deri në një vit me leje drejtimi të vlefshme të lëshuara nga autoritetet e shtetit të tyre. Për këtë arsye, fakti që një shtetas i huaj drejton një automjet në territorin shqiptar nuk do të thotë se ai është pajisur me leje shqiptare.
Në reagim theksohet edhe se Shqipëria nuk ka marrëveshje reciprociteti me Egjiptin për njohjen dhe konvertimin e lejeve të drejtimit.
Në përfundim, DPSHTRR i cilëson të pavërteta pretendimet se dy shtetasit egjiptianë ishin pajisur nga ky institucion me leje drejtimi shqiptare ose me Dëshmi Aftësie Profesionale (DAP) për profilin “Automakinist”.a.b
