Protesta e 55-të radhazi kundër qeverisë u zhvillua edhe këtë mbrëmje përpara Kryeministrisë, ku aktivistë dhe qytetarë përsëritën kërkesën për dorëheqjen e kryeministrit Edi Rama dhe ndryshime në sistemin politik.
Gjatë tubimit, aktivistja dhe anëtarja e Dhomës Britanike të Tregtisë, Silvana Xhaferi Hoxha, kritikoi deputetët dhe mënyrën e përfaqësimit në Kuvend, duke deklaruar se protestuesit prej 55 ditësh po kërkojnë llogari nga përfaqësuesit politikë.
Ajo akuzoi Policinë e Shtetit për kufizimin e së drejtës së protestës gjatë tubimeve pranë Parlamentit dhe tha se në protestë ndodhen dhjetëra juristë që po përgatisin ankesa për veprimet e policisë, duke ftuar qytetarët t’u bashkohen nismave ligjore.
Në fund të fjalës së saj, Hoxha komentoi edhe deklaratat e kryeministrit Edi Rama për dokumentin “Besa”, duke thënë se protestuesit nuk i japin besimin qeverisë dhe se ajo nuk i përfaqëson qytetarët.
Gjatë protestës foli edhe një aktivist tjetër, i cili u bëri thirrje patronazhistëve të mos provokojnë incidente dhe u kërkoi pjesëmarrësve të ruajnë qetësinë dhe të mos bien pre e provokimeve.
Sipas organizatorëve, deklaratat e kryeministrit gjatë mbledhjes së grupit parlamentar dhe qeverisë nuk kanë zbehur protestën, por kanë shtuar mobilizimin e qytetarëve, të cilët vijuan me thirrje për largimin e qeverisë dhe vazhdimin e protestave.
