Kryetari i Grupit Parlamentar të Partisë Demokratike, Gazment Bardhi, ka akuzuar qeverinë për një aferë korruptive me termocentralet lundruese “Tigri 1” dhe “Tigri 3”, duke pretenduar se i kanë shkaktuar buxhetit të shtetit një dëm prej të paktën 80 milionë eurosh.
Në një deklaratë për mediat, Bardhi tha se ka depozituar prej më shumë se një viti në SPAK prova zyrtare që, sipas tij, tregojnë se fituesi i kontratës ishte paracaktuar dhe se në Shqipëri u sollën impiante që prodhuan shumë më pak energji nga sa parashikonte kontrata.
Sipas Bardhit, nga janari 2024 deri në prill 2026, dy termocentralet kanë prodhuar vetëm 102 mijë megavat-orë energji, ndërsa kontrata parashikonte 850 mijë megavat-orë në vit, çka sipas tij përfaqëson vetëm rreth 5% të detyrimit kontraktor.
Ai akuzoi SPAK-un se, pavarësisht të dhënave që disponon për kontratën, prodhimin dhe pagesat, nuk ka ndërmarrë veprime ndaj kryeministrit Edi Rama dhe zëvendëskryeministres Belinda Balluku.
Bardhi shtoi se qeveria parashikon të shpenzojë edhe rreth 20 milionë euro të tjera për operimin dhe mirëmbajtjen e termocentraleve, ndërsa theksoi se, sipas tij, “të paprekshmit e SPAK nuk janë statistika, por kanë emër: Edi Rama dhe Belinda Balluku.” a.b
