Kryeministri Edi Rama mori pjesë këtë të premte në prezantimin e programit kombëtar “Dyfisho sipërmarrjen tënde”, një skemë mbështetëse për bizneset e vogla dhe të mesme, e cila synon të nxisë zhvillimin e sipërmarrjes në vend.
Gjatë fjalës së tij, kreu i qeverisë u ndal te zhvillimet ekonomike, duke e cilësuar forcimin e lekut dhe zhvlerësimin e euros si një pasojë të rritjes së ekonomisë shqiptare dhe jo të qarkullimit të parave të pista, siç pretendohet nga kritikët.
Rama tha se hyrja e miliarda eurove në ekonomi, rritja e turizmit dhe performanca e sektorëve të tjerë ekonomikë janë faktorët që kanë ndikuar në forcimin e monedhës kombëtare.
Kryeministri pranoi se ekonomia informale dhe paratë e paligjshme ekzistojnë, por theksoi se ky është një fenomen që nuk i përket vetëm Shqipërisë. Sipas tij, pretendimet se ekonomia shqiptare mbështetet te pastrimi i parave nuk qëndrojnë dhe nuk mbështeten nga institucionet financiare ndërkombëtare.
Ai u ndal edhe te tregu i punës, duke deklaruar se bizneset shqiptare po rrisin pagat dhe se sfida tashmë është rikthimi i shqiptarëve që kanë emigruar për punë, veçanërisht në Greqi.
Në fjalën e tij, Rama vlerësoi edhe ecurinë e sektorit të turizmit, duke bërë të ditur se këtë vit të ardhurat nga turistët e huaj pritet të arrijnë në rreth 5.7 miliardë euro. Ai pranoi se gjatë muajit qershor ritmi i rritjes së turizmit ishte më i ulët, me vetëm 1%, por e cilësoi këtë si një ngadalësim të përkohshëm.
Kryeministri argumentoi gjithashtu se progresi i Shqipërisë në procesin e integrimit europian tregon se pretendimet për një ekonomi të bazuar te pastrimi i parave nuk qëndrojnë, duke shtuar se institucionet e drejtësisë po godasin rrjetet kriminale dhe rastet e përfshirjes në aktivitete të paligjshme.
Në fund, Rama solli si shembull edhe rritjen e trafikut në Aeroportin Ndërkombëtar të Tiranës, duke deklaruar se ai është aeroporti me fluksin më të madh të pasagjerëve në rajon, gjë që, sipas tij, është një tjetër tregues i zhvillimit ekonomik të vendit.a.b
