Policia e Krujës ka identifikuar dhe shoqëruar një 14-vjeçar, i dyshuar si autor i tentativës për vjedhje me thyerje në një market në pedonalen e qytetit, ngjarje e ndodhur në orët e para të mëngjesit të së enjtes dhe e publikuar edhe në rrjetet sociale.
Sipas Policisë, menjëherë pas marrjes së njoftimit, specialistët e Seksionit për Hetimin e Krimeve të Komisariatit të Policisë Krujë kryen veprimet hetimore që çuan në identifikimin dhe shoqërimin e të miturit vetëm pak orë pas ngjarjes.
Gjatë veprimeve u sekuestruan çekiçi, që dyshohet se është përdorur për të thyer xhamat e marketit, si dhe veshjet që 14-vjeçari mbante në momentin e kryerjes së veprës.
Për shkak të moshës së tij, veprimet procedurale po kryhen në praninë e prindërve, mbrojtësit ligjor dhe psikologut.
