Opozita i ka kërkuar kreut të Prokurorisë së Posaçme (SPAK), Klodian Braho, të bëjë publike nëse në hetimet për çështjen e pronave në bregdet dhe pastrimit të parave rezultojnë të përfshirë politikanë shqiptarë që, sipas pretendimeve, kanë marrë pjesë në një takim në Aruba.
Gjatë diskutimeve, deputeti i opozitës Ivi Kaso i kërkoi kreut të SPAK të sqarojë nëse institucioni ka detyrimin t’i informojë qytetarët për identitetin e personave që dyshohet se kanë qenë pjesë e këtij takimi dhe nëse mes tyre ka pasur zyrtarë apo politikanë shqiptarë.
Kaso iu referua gjithashtu deklaratave të mëparshme të kryeministrit Edi Rama për hetimin e falsifikimit të pronave në bregdet, duke pyetur nëse qëndrime të tilla ndikojnë në punën e organit të akuzës apo në bashkëpunimin me institucionet e tjera.
Në përgjigje, kreu i SPAK nuk komentoi pretendimet konkrete, duke theksuar se dosja është ende në fazën e hetimeve. Braho u shpreh se çdo provë e administruar nga Prokuroria e Posaçme verifikohet dhe trajtohet në kuadër të procedurave ligjore.
“Është një çështje në hetim, por në SPAK nuk mund të ndodhë që një provë të mbetet pa u verifikuar dhe pa u ndërmarrë veprime”, deklaroi Braho. a.b
