Policia e Tiranës ka finalizuar operacionin e koduar “De facto”, në kuadër të hetimeve për gjurmimin dhe sekuestrimin e pasurive që dyshohet se rrjedhin nga veprimtari kriminale.
Gjatë operacionit janë sekuestruar dy apartamente dhe një garazh, me një vlerë të përafërt tregu prej 420 mijë eurosh. Sipas hetimeve, këto pasuri dyshohet se janë përfituar nga aktiviteti kriminal në fushën e trafikimit të lëndëve narkotike.
Operacioni u zhvillua pas një hetimi pasuror të kryer me metoda speciale nga specialistët e Seksionit për Hetimin e Pastrimit të Parave dhe Aseteve Kriminale, në bashkëpunim me Prokurorinë, në zbatim të ligjit “Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë”.
Pasuritë e sekuestruara dyshohet se i përkasin shtetasit H. A., 54 vjeç, i cili, sipas Policisë, ka qenë i përfshirë në veprimtari të trafikimit të lëndëve narkotike.
Autoritetet bëjnë të ditur se hetimet vijojnë për identifikimin dhe sekuestrimin e pasurive të tjera që mund të jenë krijuar nga veprimtaria kriminale e 54-vjeçarit ose e personave të lidhur me të.m.k
