Prokuroria e Posaçme Kundër Korrupsionit dhe Krimit të Organizuar (SPAK) ka paraqitur pretencën për Fatime Kryemadhin, Pirro Xhixhon dhe Ema Çokun, të tre pjesë e dosjes penale ku të pandehur janë edhe ish-presidenti Ilir Meta dhe deputetja Monika Kryemadhi.
Të tre të pandehurit do të gjykohen me procedurë të shkurtuar, pasi kanë pranuar kërkesën për zhvillimin e këtij gjykimi. Fatime Kryemadhi dhe Ema Çoku akuzohen për veprën penale të pastrimit të parave, ndërsa Pirro Xhixho për korrupsion pasiv të funksionarëve të lartë shtetërorë.
Për Pirro Xhixhon, SPAK ka kërkuar dënimin me 4 vite e 6 muaj burg. Për Fatime Kryemadhin është kërkuar dënimi me 7 vite e 6 muaj burg për pastrim parash në bashkëpunim, i cili, për shkak të gjykimit të shkurtuar, reduktohet në 5 vite burg.
Ndërkohë, për Ema Çokun, Prokuroria ka kërkuar 7 vite burg për pastrim parash në bashkëpunim. Me aplikimin e gjykimit të shkurtuar, dënimi zbret në 4 vite e 8 muaj burg. SPAK ka kërkuar gjithashtu pezullimin e ekzekutimit të dënimit me burg dhe vendosjen e saj në shërbim prove për një periudhë pesëvjeçare.
Fatime Kryemadhi, Pirro Xhixho dhe Ema Çoku po gjykohen veçmas nga Ilir Meta dhe Monika Kryemadhi, pasi Gjykata pranoi kërkesën e tyre për gjykim të shkurtuar. Kjo procedurë parashikon uljen e dënimit me një të tretën në rast shpalljeje fajtor dhe shqyrtimin e çështjes vetëm mbi bazën e provave të administruara gjatë hetimit.
Sipas SPAK, hetimet lidhen me dyshime për korrupsion, pastrim parash dhe fshehje pasurie. Në fokus të hetimit janë kontrata të padeklaruara për shërbime mjekësore, transaksione financiare të konsideruara të pajustifikuara përmes familjarëve, si edhe dyshime për lobime të paligjshme jashtë vendit dhe çështjen e njohur si “CEZ-DIA”.
