Gjykata e Fierit po zhvillon seancën për verifikimin e masave të sigurisë ndaj tre vajzave të akuzuara për dhunimin fizik dhe filmimin e një 17-vjeçareje, një ngjarje që tronditi opinionin publik pas publikimit të videos në rrjetet sociale.
Prokuroria ka kërkuar masën “arrest me burg” për 20-vjeçaren e dyshuar si organizatore e ngjarjes, “arrest në shtëpi” për njërën nga 15-vjeçaret, ndërsa për 15-vjeçaren tjetër ka kërkuar “shtrim të përkohshëm në spitalin psikiatrik” pranë Qendrës Spitalore të Burgjeve.
Sipas hetimeve, ngjarja ka ndodhur më 8 qershor në banesën e 20-vjeçares, ku dy prej vajzave dyshohet se kanë ushtruar dhunë fizike ndaj 17-vjeçares, ndërsa e treta ka filmuar të gjithë skenën me telefon celular.
Rasti u bë publik rreth një muaj më vonë, pasi videoja u shpërnda në rrjetet sociale. Vetëm pas publikimit të pamjeve, e mitura i tregoi nënës së saj për ngjarjen dhe denoncoi rastin në polici.
Sipas organit të akuzës, tre vajzat kanë pranuar përfshirjen në ngjarje, duke e justifikuar veprimin me “motive të dobëta”.
Ndërkohë, nëna e 15-vjeçares për të cilën është kërkuar shtrimi në spital psikiatrik ka reaguar publikisht, duke shprehur shqetësimin se nuk është informuar nga institucionet për diagnozën apo trajtimin e vajzës së saj.
Ajo ka deklaruar se e bija kishte shfaqur prej kohësh probleme të shëndetit mendor dhe se, kur familja kërkoi ndihmë nga psikologia e shkollës publike, nuk mori mbështetjen e nevojshme. Sipas saj, më pas u detyruan ta regjistronin vajzën në një shkollë private, por ajo nuk arriti të ndiqte asnjë ditë mësim për shkak të frikës nga bullizmi.
Gjykata pritet të vendosë mbi masat e sigurisë për tre të dyshuarat pas shqyrtimit të kërkesave të Prokurorisë dhe pretendimeve të palëve.
