Drejtoria Vendore e Policisë Tiranë ka bërë publike planin e masave për menaxhimin e trafikut gjatë zhvillimit të aktivitetit muzikor “YE”, që do të mbahet më 11 korrik në zonën e Kasharit.
Sipas njoftimit, do të ketë kufizime të përkohshme të qarkullimit në disa akse kryesore të kryeqytetit.
Nga ora 07:00 deri në orën 24:00 do të ndalohet qarkullimi në aksin dytësor të autostradës “Durrës–Tiranë”, nga “Eiffeli” deri te “Casa Italia”, ndërsa ky segment do të funksionojë vetëm me sens daljeje për subjektet. Po në të njëjtin interval kohor do të bllokohet edhe korsia e daljes së autostradës “Durrës–Tiranë” në rrethrrotullimin e “Casa Italia”.
Ndërkohë, nga ora 12:00 deri në orën 24:00 nuk do të lejohet qarkullimi në segmentin “Casa Italia” – rruga “Pavarësia” – rruga “Sokrat Miho”, si dhe në segmentin “Rruga ‘Sokrat Miho’ – rruga ‘Kasem Shima’ – rruga ‘7 Nëntori’”, i cili do të funksionojë vetëm me sens daljeje.
Policia bën me dije se nga Ura e Institutit deri te “Casa Italia” mund të ketë edhe bllokime të pjesshme të qarkullimit, në varësi të fluksit të pjesëmarrësve, me qëllim garantimin e sigurisë dhe menaxhimin e trafikut.
Gjatë orareve të kufizimeve, akses në zonat e bllokuara do të kenë vetëm automjetet e emergjencës dhe mjetet e Policisë së Shtetit.
Policia e Tiranës u ka kërkuar qytetarëve mirëkuptim dhe u ka bërë thirrje drejtuesve të mjeteve të planifikojnë lëvizjet e tyre duke përdorur akse alternative dhe duke respektuar udhëzimet e efektivëve të policisë.
