Kreu i Partisë Demokratike, Sali Berisha, deklaroi gjatë një komunikimi në rrjetet sociale se protestat e opozitës kanë pasur një ndikim të rëndësishëm në planin ndërkombëtar, duke kundërshtuar sipas tij propagandën që e paraqet korrupsionin si pjesë të kulturës së shqiptarëve.
Në një prononcim për mediat, Berisha u pyet nga gazetari Kevin Veliu lidhur me faktin se protestat e vazhdueshme të opozitës nuk kanë prodhuar ende një ndryshim konkret politik. Ai theksoi se rezultatet duhet të analizohen me objektivitet, duke krahasuar situatën e sotme me atë të disa muajve më parë.
Sipas Berishës, protestat kanë shërbyer për të mbrojtur dinjitetin e shqiptarëve në arenën ndërkombëtare dhe për të kundërshtuar deklaratat që, sipas tij, janë bërë nga lobistë në mbrojtje të kryeministrit Edi Rama, të cilët kanë pretenduar se korrupsioni është pjesë e kulturës shqiptare.
“Me protestat tona i faktuam botës se shqiptarët nuk janë një komb që kanë kulturë korrupsionin dhe vjedhjen. Shqiptarët nuk e pranojnë korrupsionin”, u shpreh Berisha.
Ai shtoi se këto protesta, sipas tij, kanë tërhequr vëmendjen e opinionit publik ndërkombëtar dhe kanë vendosur në qendër të kritikave qeverinë dhe figura të saj, mes tyre edhe zëvendëskryeministren Belinda Balluku.
Berisha theksoi gjithashtu se zëri i opozitës ka ndikuar që, sipas tij, vëmendja ndërkombëtare të përqendrohet tek zbatimi i shtetit ligjor në Shqipëri dhe trajtimi i zyrtarëve të lartë njësoj para ligjit.
Megjithatë, kreu i PD-së pranoi se protestat nuk kanë arritur ende efektin maksimal që opozita synon, që është largimi i qeverisë, por shtoi se ato kanë shërbyer për të “damkosur regjimin e korruptuar”.
Në fund, Berisha theksoi se Partia Demokratike mbetet e vendosur për të vijuar protestat paqësore deri në largimin e kryeministrit Rama nga pushteti.
“Ne nuk pranojmë kurrë të vijmë në pushtet me dhunë. Jemi themeluar mbi vlerat e lirisë, votës së lirë dhe të drejtave të njeriut. Ndaj do të vazhdojmë protestat paqësore deri në largimin e Edi Ramës”, deklaroi ai. a.b
