Kryeministri Edi Rama, gjatë fjalës së mbajtur në Asamblenë e Partisë Socialiste në njësinë 14 në Tiranë këtë 2 prill, u ndal te disa nga çështjet që sipas tij shqetësojnë qytetarët, mes tyre procesi i legalizimeve, pensionet dhe integrimi europian.
Rama bëri të ditur se deri më tani janë realizuar rreth 300 mijë legalizime në të gjithë vendin, ndërsa shtoi se procesi vijon ende për rastet që plotësojnë kriteret ligjore.
Sipas tij, ka edhe ndërtime që nuk mund të legalizohen, pasi janë ngritur në zona ku ligji nuk e lejon, si mbi kolektorë, mbi rrugë apo në hapësira të tjera publike.
Kreu i qeverisë theksoi gjithashtu se një nga problemet që kërkon zgjidhje është fakti që disa qytetarë presin prej shumë vitesh për legalizimin e banesave të tyre, ndërsa të tjerë që kanë aplikuar më vonë e kanë përfituar më shpejt këtë proces.
“Janë bërë rreth 300 mijë legalizime në total. Ka ende për t’u bërë, por ka edhe raste që nuk bëhen dot sepse janë ndërtuar mbi kolektorë, mbi rrugë apo në zona të tjera problematike. Ajo që më shqetëson është pse dikush që pret që nga viti 2010 duhet të presë ende, ndërsa dikush që ka aplikuar në 2018 e merr më shpejt. Do të krijojmë një sistem me kritere të qarta sipas viteve të aplikimit”, tha Rama.
Ai shtoi se një nga hapat për të përshpejtuar proceset është digjitalizimi i plotë i hartave në Kadastër, i cili sipas tij do të përfundojë brenda vitit 2027, duke e bërë më të lehtë administrimin e pronave dhe procedurat për qytetarët.
Në fjalën e tij, Rama u ndal edhe te pensionet, duke theksuar se rritja e tyre do të vijojë në të ardhmen, pasi sipas tij ekonomia e vendit është në rritje dhe krijon më shumë mundësi financiare.
Kryeministri foli edhe për integrimin europian, duke theksuar se anëtarësimi në Bashkimin Europian do t’u sjellë përfitime të drejtpërdrejta qytetarëve shqiptarë, si më shumë mundësi për punësim në vendet e BE-së dhe akses më të lehtë në universitetet europiane.
