Gjykata Kushtetuese ka rrëzuar njëzëri ndryshimet në Rregulloren e Kuvendit, të miratuara në shtator 2025 vetëm me votat e shumicës së Partia Socialiste e Shqipërisë.
Sipas arsyetimit të gjyqtarëve, shumica parlamentare ka kryer shkelje kushtetuese që lidhen me mosrespektimin e afateve proceduriale për miratimin e ndryshimeve, si edhe me afatet e njoftimit të seancës plenare.
Ndryshimet u ndërmorën në fillim të legjislaturës së re, ku PS riorganizoi strukturën e komisioneve të përhershme parlamentare, duke ndryshuar numrin e tyre — një lëvizje që opozita e konsideroi si dobësim të rolit të saj në Kuvend.
Një e pesta e deputetëve të opozitës iu drejtuan Gjykatës Kushtetuese me kërkesë për shfuqizimin e vendimit nr. 57, datë 16 shtator 2025. Këtë të hënë, Gjykata njoftoi pranimin e plotë të kërkesës dhe rrëzimin e ndryshimeve në Rregullore.
Me këtë vendimmarrje bie edhe Komisioni i posaçëm për Nisma Qytetare, Bashkëpunim dhe Mbikëqyrjen Institucionale, i drejtuar nga Fatmir Xhafaj. Ky komision ishte kthyer në një pikë përplasjeje mes Kuvendit dhe institucioneve të pavarura, ndërsa mënyra e ngritjes së tij ishte krahasuar nga kritikët me “kontrollet punëtore” të periudhës komuniste.
Pak javë më parë, Prokuroria e Posaçme kundër Korrupsionit dhe Krimit të Organizuar kishte refuzuar një kërkesë të këtij komisioni për zhvillimin e një vizite inspektuese në ambientet e saj. Kreu i SPAK, Klodian Braho, argumentoi se kërkesa cenonte pavarësinë institucionale.
