Ilir Meta
Instituti ndërkombëtar kërkimor IFIMES, me qendër në Ljubljanë dhe degë në Bruksel e Uashington, ka publikuar një raport lidhur me rastin e ish-presidentit të Republikës, Ilir Meta, ku ngrihen shqetësime serioze për shkelje të të drejtave të njeriut qoftë gjatë arrestimit të tij e qoftë gjatë mbajtjes në burg.
Sipas studimit të Institutit për Studime në Lindjen e Mesme dhe Ballkan, në rastin e Ilir Metës janë shkelur rëndë dispozitat e Konventës Europiane për të Drejtat e Njeriut, përfshirë liritë dhe të drejtat themelore, si dhe parimi i prezumimit të pafajësisë.
Raporti thekson se gjatë arrestimit dhe ndalimit janë konstatuar mangësi serioze procedurale, të dokumentuara edhe nga Avokati i Popullit, duke vënë në pikëpyetje respektimin e standardeve evropiane të shtetit të së drejtës.
IFIMES vlerëson se ky rast përbën një shembull të instrumentalizimit politik të drejtësisë dhe paralajmëron për rrezikun e drejtësisë selektive në një demokraci në tranzicion.
Në përfundim, Instituti kërkon monitorim ndërkombëtar të çështjes Meta, me qëllim garantimin e respektimit të plotë të të drejtave të njeriut, transparencës dhe standardeve demokratike në Shqipëri. a.b
