Kryesia e Kuvendit
Përfaqësuesit e opozitës kanë bojkotuar për herë të katërt mbledhjen e Komisionit të Posaçëm Parlamentar për Reformën Administrativo-Territoriale, duke vijuar mungesën e tyre në këtë proces.
Duke komentuar situatën, përfaqësuesi i mazhorancës, Arbjan Mazniku, deklaroi se shumica i ka kërkuar Kuvendit, që javën e kaluar, ndryshimin e formulës së përbërjes së komisionit, përmes shtimit të një anëtari nga mazhoranca, me qëllim krijimin e një mekanizmi zhbllokues për funksionimin e tij.
Sipas Maznikut, bojkotimi i opozitës ka sjellë humbjen e dy muajve kohë, gjatë së cilës komisioni mund të kishte prodhuar rezultate konkrete. Ai theksoi se dita e sotme ishte afati i fundit i vendosur nga mazhoranca për rikthimin e Partisë Demokratike në komision, në të kundërt do të procedohet me ndryshimin e përbërjes.
Mazniku bëri të ditur se ndryshimi i formulës së komisionit pritet të kalojë për miratim në seancën plenare të së martës. Ai shtoi se mazhoranca i ka ofruar opozitës të gjitha garancitë për pjesëmarrje aktive në komision dhe se opozita do të vijojë të ketë tetë anëtarët e saj.
“U humbën dy muaj që komisioni mund të kishte produkt. I kemi dhënë të gjitha garancitë opozitës për të qenë pjesë e këtij procesi. Ndryshimi i përbërjes synon vetëm zhbllokimin e punës së komisionit dhe jo përjashtimin e opozitës”, deklaroi Mazniku, duke nënvizuar se puna për reformën administrativo-territoriale do të vijojë. a.b
