Ka përfunduar protesta kombëtare e organizuar nga lëvizja “Shqipëria Bëhet”, e cila shënon demonstratën e katërt radhazi të kësaj nisme. Qindra qytetarë iu bashkuan tubimit, duke bërë thirrje për mobilizim të gjerë dhe protesta masive kundër korrupsionit dhe qeverisjes aktuale.
Protestuesit u mblodhën para Kryeministrisë me pankarta dhe slogane kundër kryeministrit Edi Rama, ku mesazhet kryesore ishin: “Edi Rama o hajdut”, “Ku shkuan miliardat e vjedhura” dhe “Edi Rama je bo bajat”. Në protestë morën pjesë edhe shqiptarë nga Diaspora.
Gjatë fjalës së tij para protestuesve, drejtuesi i lëvizjes, Adriatik Lapaj, adresoi një sërë akuzash ndaj qeverisë Rama, duke renditur disa prej aferave që, sipas tij, dëshmojnë nevojën për largimin e saj. Lapaj përmendi çështje që lidhen me zëvendëskryeministren Belinda Balluku, si dhe skandalet e lidhura me AKSHI-n.
Ai theksoi se qeveria nuk ka dhënë dorëheqjen pavarësisht, sipas tij, kapjes në skandale financiare me vlera dhjetëra milionë euro, ndërsa akuzoi mazhorancën se ka detyruar të rinjtë të largohen nga vendi. Sipas Lapajt, çdo ditë që kalon forcon pushtetin e një pakice që, siç u shpreh ai, ka zaptuar institucionet dhe përfiton nga fondet publike.
Në fjalën e tij, Lapaj e cilësoi situatën si një përplasje mes qytetarëve të zakonshëm dhe një elite politike e ekonomike, duke theksuar vështirësitë e pensionistëve dhe familjeve me të ardhura të ulëta, përballë luksit të zyrtarëve të lartë.
