SPAK
Prokuroria e Posaçme kundër Korrupsionit dhe Krimit të Organizuar i ka thënë “Jo” Komisionit Parlamentar “Për Nismat Qytetare, Bashkëpunimin dhe Mbikëqyrjen Institucionale”, të drejtuar nga Fatmir Xhafaj për një vizitë monitoruese në SPAK, në lidhje me zbatimin e masave për luftën kundër pastrimit të parave.
Në përgjigjen ndaj Kuvendit, SPAK sqaron se raportimi institucional është kryer dhe vijon të kryhet në mënyrë të rregullt dhe të plotë. Prokurorët vënë në dukje se nga ana e Agjencisë së Inteligjencës Financiare nuk ka pasur asnjë shqetësim konkret, asnjë çështje specifike dhe asnjë problem që të kërkonte një ndërhyrje të jashtëzakonshme parlamentare.
SPAK i kujton Kuvendit dhe Komisionit Xhafaj se është institucion i pavarur kushtetues. “Prokuroria e Posaçme nuk mund të monitorohet dhe nuk njeh legjitimitetin e kësaj praktike”.
Ky inspektim do të binte ndesh me pavarësinë kushtetuese të Prokurorisë së Posaçme, një pavarësi që nuk është thjesht një parim formal, por kusht themelor për të siguruar hetime të pavarura, të paanshme dhe efikase në mbrojtje të interesit publik dhe sundimit të ligjit, thuhet ndër të tjera në përgjigje.
Në përfundim, SPAK shpreh hapur mosdakordësinë për realizimin e vizitës së planifikuar nga Komisioni Xhafaj që ishte planifikuar të zhvillohej në datën 6 shkurt 2026, duke e konsideruar atë në kapërcim të ligjit dhe cenim të pavarësisë së Prokurorisë së Posaçme.
Në shkresë nënvizohet gjithashtu se SPAK ka raportuar më herët mbi zbatimin e rekomandimeve të Task-Forcës, në kuadër të procesit të vlerësimit të Shqipërisë nga Moneyval, organizata ndërkombëtare e monitorimit kundër pastrimit të parave.
Nisma për të bërë një vizitë monitoruese në SPAK është ndërmarrë në datën 18 dhjetor të vitit të kaluar, pra dy ditë pasi prokurori Dritan Prençi dorëzoi në parlament kërkesën për autorizim për arrestimin e Belinda Ballukut.
