Kryeministri Edi Rama, i cili ndodhet në Jeruzalem në kuadër të pjesëmarrjes në Konferencën Ndërkombëtare për Luftën kundër Antisemitizmit, zhvilloi sot një takim kokë më kokë me Kryeministrin e Izraelit, Benjamin Netanyahu. Takimi u pasua nga bisedime mes delegacioneve respektive dhe më pas nga një deklaratë e përbashkët për shtyp.
Kryeministri i Izraelit, Benjamin Netanyahu, vlerësoi rolin historik të Shqipërisë dhe qëndrimin e saj ndaj Izraelit, duke nënvizuar edhe rritjen e bashkëpunimit dypalësh.
Kryeministri i Izraelit Benjamin Netanyahu:
“Dua t’i uroj mirëseardhjen Kryeministrit Edi Rama nga Shqipëria. Ai është një mik i madh i popullit hebre dhe i shtetit të Izraelit, si dhe një mik personal imi. Kryeministri Rama përfaqëson shpirtin e vërtetë të Shqipërisë, një vend unik në Evropë, ku gjatë Holokaustit popullsia hebreje jo vetëm që nuk u zvogëlua, por u rrit, falë guximit moral dhe tolerancës së shqiptarëve. Kjo histori duhet të njihet nga e gjithë bota. Shqipëria qëndroi krah Izraelit në momentet më të vështira dhe kjo busull morale nuk u lëkund. Marrëdhëniet mes dy vendeve tona po forcohen ndjeshëm, si në turizëm ashtu edhe në ekonomi, dhe kjo miqësi ka themele të thella njerëzore e morale.”
Nga ana e tij, Kryeministri Edi Rama theksoi lidhjet historike mes dy popujve, qëndrimin e palëkundur të Shqipërisë kundër antisemitizmit dhe bashkëpunimin strategjik me Izraelin në fusha kyçe.
Kryeministri Edi Rama:
“Shqipëria dhe Izraeli ndajnë marrëdhënie të shkëlqyera, të rrënjosura në një miqësi të thellë historike mes popujve tanë. Trashëgimia jonë në mbrojtjen e hebrenjve gjatë Holokaustit është dëshmi e kurajës morale të gjyshërve tanë dhe një vlerë që duhet trashëguar brez pas brezi. Shqipëria mban një qëndrim të qartë dhe të pandryshuar kundër antisemitizmit, ashtu si kundër çdo forme tjetër urrejtjeje. Ne qëndruam dhe do të qëndrojmë krah Izraelit kundër terrorizmit, ndërsa njëkohësisht mbështesim paqen dhe stabilitetin në rajon. Bashkëpunimi ynë në fushën e sigurisë, mbrojtjes, teknologjisë dhe ekonomisë po thellohet dhe do të vijojë të forcohet, në dobi të të dy popujve tanë.”
Takimi konfirmoi vullnetin e përbashkët për forcimin e mëtejshëm të marrëdhënieve politike, ekonomike dhe të sigurisë mes Shqipërisë dhe Izraelit, si dhe rolin aktiv të Shqipërisë në nismat ndërkombëtare për paqe dhe stabilitet.a.b
