Një ngjarje e rëndë është shënuar këtë të martë në Spitalin Rajonal të Durrësit, ku paraburgosuri Altin Ndoci është larguar nga ambientet e spitalit gjatë kohës që ndodhej aty për kryerjen e vizitave mjekësore.
Sipas një deklarate paraprake, Ndoci ishte shoqëruar në spital nën masa sigurie dhe të gjitha procedurat mjekësore janë zhvilluar në repartin e infektivit, i cili disponon edhe sektor të posaçëm sigurie për të dënuarit dhe paraburgosurit. Megjithatë, pavarësisht ndërhyrjes së menjëhershme të forcave të Policisë së Burgjeve për ta ndaluar, ai ka arritur të largohet nga spitali.
Menjëherë pas ngjarjes, strukturat përkatëse janë vënë në lëvizje dhe po punohet intensivisht për lokalizimin dhe kapjen e tij, si dhe për sqarimin e plotë të rrethanave të arratisjes.
Altin Ndoci është i njohur për drejtësinë si një person me rrezikshmëri të lartë. Ai dyshohet se ka qenë pjesëmarrës në masakrën e Bradasheshit dhe është i akuzuar nga SPAK për vrasje dhe përfshirje në veprimtari të grupit kriminal. Gjithashtu, Ndoci dyshohet edhe për përfshirje në atentatin ndaj vëllait të Erion Alibejt, Besmir dhe Viktor Haxhisë, Dorjan Shkozës dhe Anxhelo Avdisë. r.k
